جاوید ڈار نے کہا کہ امسال بھی سیاحوں کی ریکارڈ تعداد متوقع ہے، جو اس شعبے سے وابستہ لوگوں کے لئے ہی نہیں بلکہ جموں وکشمیر کے تمام لوگوں کے لئے خوش آئند ہے۔
فائل تصویر آئی اے این ایس
زراعت اور دیہی ترقی اور پنچایتی وزیر جاوید احمد ڈار نے امسال ریکارڈ توڑ سیاحوں کی آمد کی امید ظاہر کرتے ہوئے کہا کہ سیاحوں کی آمد جموں و کشمیر کے تمام لوگوں کے لئے خوش آئند ہے۔ انہوں نے کہا کہ حکومت جموں وکشمیر میں مزید سیاحتی مقامات کو ترقی دینے کے لئے پر عزم ہے۔
موصوف وزیر نے ان باتوں کا اظہار بدھ کے روز یہاں باغ گل لالہ کھولنے کے موقع پر نامہ نگاروں کے ساتھ بات کرنے کے دوران کیا۔انہوں نے کہا کہ ‘امسال بھی سیاحوں کی ریکارڈ تعداد متوقع ہے، جو اس شعبے سے وابستہ لوگوں کے لئے ہی نہیں بلکہ جموں وکشمیر کے تمام لوگوں کے لئے خوش آئند ہے’۔
ان کا کہنا تھا کہ ‘حکومت کی کوشش ہے کہ یہاں ہر جگہ ایسے باغ لگائے جائیں جو سیاحوں کو اپنی طرف کھینچ سکیں’۔
انہوں نے کہا کہ یہاں بہت ساری ایسی جگہیں ہیں جہاں ٹولپ لگائے جا سکتے ہیں۔جاوید ڈار نے کہا کہ حکومت سیاحت کے شعبے کو فروغ دینے کے لئے پر عزم ہے۔
زرعی اراضی کو تجارتی مقاصد کے لیے استعمال کرنے سے متعلق ایک سوال کے جواب میں انہوں نے کہا کہ ‘موجودہ قوانین پر سختی سے عمل کیا جا رہا ہے، قانون پہلے سے موجود ہے اور ہم زرعی زمین کے غلط استعمال کو روکنے کے لیے ہر ممکن کوشش کر رہے ہیں’۔ کشمیر کی مجموعی صورتحال پر تبصرہ کرتے ہوئے ان کا کہنا تھا کہ ‘کشمیر میں حالات بہتر ہوئے ہیں اور ہمیں امید ہے کہ یہ مثبت رجحان جاری رہے گا’۔
