رپورٹ کے مطابق نان ویج تھالی کی قیمتوں میں اضافے کی بڑی وجہ برائلر چکن کی قیمتوں میں ہونے والا اضافہ بتایا جا رہا ہے۔
ہندوستان میں مہنگائی دن بہ دن بڑھتی جا رہی ہے۔ اس کی تازہ مثال فروری ماہ میں ’نان ویج‘ تھالی کی بڑھی ہوئی قیمت ہے۔ ایک رپورٹ میں انکشاف ہوا ہے کہ نان ویج تھالی کی قیمت تقریباً 6 فیصد بڑھ گئی ہے۔ حالانکہ ایک اچھی خبر یہ ضرور ہے کہ ویج تھالی کی قیمت میں ایک فیصد کی کمی دیکھنے کو ملی ہے۔ یہ دعویٰ کریسل نے اپنی ایک تازہ رپورٹ میں کیا ہے۔ کریسل کی رپورٹ کے مطابق ویج تھالی کی قیمت میں کمی کی اہم وجہ ٹماٹر اور ایل پی جی کی قیمتوں میں ہوئی کمی ہے، جبکہ نان ویج تھالی کی قیمتوں میں اضافے کی وجہ برائلر چکن کی قیمتوں میں اضافہ رہا۔
کریسیل نے اپنی رپورٹ میں کہا کہ ’’فروری میں ٹماٹر کی کم قیمتوں کے درمیان ویج تھالی کی قیمت میں سال بہ سال کمی آئی ہے۔ دوسری جانب برائلر چکن کی قیمتوں میں اضافے کی وجہ سے نان ویج تھالی کی قیمتوں میں معمولی اضافہ ہوا ہے۔‘‘ رپورٹ یہ بھی درج ہے کہ فروری میں ٹماٹر کی قیمت ایک سال قبل کے 32 روپے فی کلوگرام سے 28 فیصد کم ہو کر 23 روپے فی کلوگرام ہو گئی ہے۔ یہ کمی بازار میں ٹماٹر کی آمد میں 20 فیصد اضافے کی وجہ سے ہوئی ہے۔ اس کے علاوہ ایل پی جی کی قیمتوں میں بھی 11 فیصد کی کمی آئی ہے، جس سے مزید راحت ملی ہے۔ دہلی میں 14.2 کلوگرام والے ایل پی جی سلنڈر کی قیمت گزشتہ سال کے 903 روپے سے کم ہو کر 803 روپے ہو گئی ہے۔
حالانکہ ویج تھالی کی قیمت میں مجموعی کمی دیگر اہم اجزاء کی قیمتوں میں اضافے کی وجہ سے محدود رہی۔ گزشتہ سال کے مقابلے پیاز کی قیمتوں میں 11 فیصد، آلو کی قیمتوں میں 16 فیصد اور خوردنی تیل کی قیمتوں میں 18 فیصد کا اضافہ ہوا ہے۔ ان اجزاء کی قیمتوں میں اضافے نے ویج تھالی کی قیمت میں تیزی سے کمی کو روک دیا ہے۔
دوسری جانب، برائلر چکن کی قیمتوں میں سال بہ سال 15 فیصد کے اضافے کی وجہ سے نان ویج تھالی زیادہ مہنگی ہو گئی۔ نان ویج تھالی کی قیمت میں برائلر چکن کا حصہ تقریباً 50 فیصد ہوتا ہے اور اس کی قیمت میں اضافہ گزشتہ سال کی کم قیمت کی بنیاد کے سبب ہوا، جب زیادہ سپلائی کی وجہ سے قیمتیں کم ہو گئی تھیں۔ اس کے علاوہ برائلر مرغیوں کے لیے فیڈ کی قیمتوں میں اضافہ ہوا، مکئی کی قیمتوں میں سالانہ بنیاد پر 6 فیصد کا اضافہ ہوا، جس سے مجموعی قیمتوں میں مزید اضافہ دیکھنے کو ملا۔
قابل ذکر ہے کہ جنوبی ہندوستان میں برڈ فلو کے خدشات کے درمیان کمزور طلب کی وجہ سے فروری میں برائلر چکن کی قیمتوں میں تقریباً 5 فیصد کی کمی آئی ہے۔ ان اتار چڑھاؤ کے باوجود، خوراک کی بڑھتی قیمتیں گھریلو بجٹ کو بگاڑنے میں ایک اہم وجہ بنی ہوئی ہیں۔ آنے والے مہینوں میں سپلائی کی صورتحال میں مزید تبدیلی خوراک کی قیمتوں کو متاثر کرے گی۔
