رمضان المبارک کا چاند نظر نہیں آیا، پہلا روزہ اتوار کو

آج ملک کی مختلف رویت ہلال کمیٹیوں نے رمضان المبارک کا چاند دیکھنے کا خاص اہتمام کیا، لیکن کہیں سے بھی ہلال رمضان کی اطلاع موصول نہیں ہوئی ہے۔ امارت شرعیہ ہند نے کہیں سے چاند دیکھے جانے کی جانکاری حاصل نہ ہونے کے بعد 30 کی رویت مانتے ہوئے پہلا روزہ 2 مارچ بروز اتوار رکھے جانے کا اعلان کیا ہے۔ اس سلسلے میں امارت شرعیہ ہند نے ایک پریس بیان بھی جاری کیا ہے۔

امارت شرعیہ ہند جاری پریس بیان میں کہا ہے کہ ’’آج ابھی بعد نماز مغرب رویت ہلال کمیٹی امارت شرعیہ ہند کی میٹنگ زیر صدارت مفتی محمد ذکاوت حسین قاسمی، نائب امیر شریعت صوبہ دہلی و شیخ الحدیث مدرسہ امینیہ کشمیری گیٹ بمقام دفتر امارت شرعیہ ہند، 1- بہادر شاہ ظفرمارگ نئی دہلی منعقد ہوئی۔ چاند دیکھنے کا اہتمام کیا گیا۔ دہلی میں مطلع ابر آلود ہے، (اس لیے) چاند نظر نہیں آیا۔ ملک کے متعدد مقامات سے رابطہ کیا گیا، کہیں سے رویت کی اطلاع موصول نہیں ہوئی۔‘‘

اس پریس بیان میں امارت شرعیہ ہند نے 2 مارچ کو یکم رمضان ہونے کی جانکاری دیتے ہوئے لکھا ہے کہ ’’کمیٹی نے 30 کی رویت کا اعتبار کر کے اعلان کیا کہ 2 مارچ 2025ء بروز اتوار، ماہ رمضان المبارک 1446ھ کی پہلی تاریخ ہوگی۔ ان شاء اللہ۔‘‘