واشنگٹن:امریکی سابق صدر ڈونلڈ ٹرمپ کی جانب سے “ٹرمپ غزہ” کے عنوان سے ایک اے آئی جنریٹڈ ویڈیو جاری کیے جانے پر سوشل میڈیا پر ہنگامہ مچ گیا، یہاں تک کہ ان کے اپنے حامیوں نے بھی اس اقدام کی مذمت کی۔
ویڈیو میں غزہ کو ایک Beach Resort میں تبدیل ہوتے ہوئے دکھایا گیا ہے، جہاں ایلون مسک ساحل پر بیٹھے کھا پی رہے ہیں اور نوٹ برس رہے ہیں۔ اس ویڈیو میں نائٹ کلبز، پرتعیش ہوٹل، پارٹیاں، اور ٹرمپ کا ایک دیو ہیکل سنہری مجسمہ بھی شامل ہے، جس سے انہیں ایک “نجات دہندہ” کے طور پر پیش کرنے کی کوشش کی گئی ہے۔
ویڈیو میں “ٹرمپ غزہ” نامی ایک فائیو اسٹار ہوٹل، دکانوں میں ٹرمپ کے سنہری مجسمے، اور بچوں کے ہاتھوں میں ٹرمپ کے چہرے والے سنہری غبارے بھی دکھائے گئے ہیں۔
حیران کن طور پر، ویڈیو میں داڑھی والی رقاصائیں بھی نظر آتی ہیں، جو ٹرمپ کی اینٹی-ٹرانس پالیسیوں کے بالکل برعکس ہے۔
سوشل میڈیا صارفین نے اس ویڈیو کو “گھناؤنا، شرمناک اور بے حسی کی انتہا” قرار دیا۔ ایک انسٹاگرام صارف نے تبصرہ کیا:”غزہ فلسطینیوں کا ہے، ٹرمپ کی خیالی جنت نہیں!”
بہت سے صارفین نے اسے “نازی نظریہ کی علامت” قرار دیا اور فلسطینیوں کے قتل عام کے دوران اس طرح کی بے حسی پر مبنی پروپیگنڈہ ویڈیو کو سخت تنقید کا نشانہ بنایا۔
یہ ویڈیو نہ صرف فلسطینی عوام کے زخموں پر نمک چھڑکنے کے مترادف سمجھی جا رہی ہے بلکہ ٹرمپ کی صدارتی مہم کے متنازعہ ہتھکنڈوں کا ایک اور ثبوت بھی قرار دی جا رہی ہے۔
ہمیں فالو کریں
