’مودی اپنے اچھے دوست کو یاد دلائیں کہ ڈبلیو ٹی او میں ٹی کا مطلب ٹرمپ نہیں بلکہ ٹریڈ ہے‘، کانگریس کا طنز

امریکی صدر ڈونالڈ ٹرمپ کی نئی ٹریڈ پالیسی کے خلاف آج کانگریس نے آواز بلند کی اور ساتھ ہی مودی حکومت پر بھی طنز کے تیر چلائے۔ کانگریس کا کہنا ہے کہ باہمی ٹیکس بین الاقوامی تجارت کے سبھی منظور شدہ اصولوں کے خلاف ہے۔ یہ بیان کانگریس جنرل سکریٹری جئے رام رمیش کی طرف سے دیا گیا ہے اور انھوں نے ہندوستانی وزیر اعظم نریندر مودی سے کہا ہے کہ انھیں ہمت کر کے اپنے ’اچھے دوست‘ ڈونالڈ ٹرمپ کو یاد دلانا چاہیے کہ ’ڈبلیو ٹی او‘ میں ’ٹی‘ کا مطلب ٹریڈ (تجارت) ہے، نہ کہ ٹرمپ۔

جئے رام رمیش کی طرف سے یہ رد عمل امریکی صدر ڈونالڈ ٹرمپ کے اس بیان کے بعد سامنے آیا ہے جس میں انھوں نے کہا کہ امریکہ جلد ہی ہندوستان اور چین جیسے ممالک پر باہمی ٹیکس لگائے گا۔ اس کا مطلب یہ ہے کہ امریکہ انے ممالک پر وہی ٹیکس لگائے گا جو وہ امریکی مصنوعات پر لگاتے ہیں۔ جئے رام رمیش نے اس پالیسی کو بین الاقوامی تجارت کے اصولوں کے خلاف قرار دیا۔ کانگریس نے حکومت سے یہ جواب بھی مانگا ہے کہ وہ اس نئی امریکی پالیسی کا مقابلہ کس طرح کرے گی، اور ہندوستانی تجارت، صنعت و کسانوں کے مفادات کی حفاظت کس طرح کرے گی۔

اس درمیان کانگریس کے میڈیا اور تشہیر محکمہ کے سربراہ پون کھیڑا نے امریکی نئی پالیسی پر مودی حکومت سے 5 سوالات پوچھے ہیں۔ یہ سوالات انھوں نے سوشل میڈیا پلیٹ فارم ’ایکس‘ پر کیے گئے ایک پوسٹ میں پوچھا ہے۔ جئے رام رمیش کے ذریعہ پوچھے گئے سوالات اس طرح ہیں:

1. اگر امریکہ سے درآمدات بڑھتی ہے، تو ہندوستان کے کسانوں پر اس کا کیا اثر پڑے گا؟ حکومت ان کی حفاظت کے لیے کیا قدم اٹھائے گی، جو کہ وَرک فورس کا 45.76 فیصد ہیں؟

2. کیا حکومت اب ایم ایس پی کو قانونی درجہ دینے پر غور کرے گی تاکہ کسانوں کی آمدنی محفوظ کی جا سکے؟

3. کیا حکومت ہند یہ یقینی بنائے گی کہ ہندوستان امریکی زرعی مصنوعات کا کچرا گھر نہ بن جائے اور سستے امریکی مصنوعات یہاں نہ بھرے جائیں؟

4. امریکہ کے ٹیرف کے جواب میں ہندوستانی برآمدات مہنگی ہوگی، جس سے ایم ایس ایم ای سیکٹر متاثر ہوگا۔ حکومت اسے کس طرح بچائے گی؟

5. باہمی ٹیکس سے ہندوستان کی جی ڈی پی پر کیا اثر پڑے گا؟