نئی دہلی : بھارتیہ جنتا پارٹی (بی جے پی) نے آج ریکھا گپتا کو دہلی کی نئی چیف منسٹر کے طور پر منتخب کیا۔ پارٹی نے ابھی تک دہلی میں کسی نائب چیف منسٹر ٰ کا انتخاب نہیں کیا ہے۔
دہلی اسمبلی انتخابات میں دو تہائی اکثریت کے ساتھ کامیاب ہونے والی بی جے پی دہلی اسٹیٹ ہیڈکوارٹر میں منعقدہ نو منتخب قانون ساز پارٹی کی میٹنگ میں مرکزی مبصر روی شنکر پرساد، اوم پرکاش دھنکر اور انتخابی انچارج بیجنت جے پانڈا کی موجودگی میں ریکھا گپتا کو لیڈر منتخب کیا گیا۔
پارٹی کے قومی میڈیا کے شریک انچارج سنجے میوکھ نے کہا کہ میٹنگ میں پرویش ورما، وجیندر گپتا اور ستیش اپادھیائے نے ریکھا گپتا کے نام کی تجویز پیش کی جسے متفقہ طور پر قبول کرلیا گیا۔ میٹنگ میں کسی کو ڈپٹی چیف منسٹر کے طور پر منتخب نہیں کیا گیا۔بعد ازاں ریکھا گپتا نے پارٹی کی قومی قیادت، ایم ایل ایز اور دہلی کے عوام کے تئیں اظہار تشکر کیا۔
میٹنگ کے بعد گپتا کے ساتھ پارٹی کے دہلی کے ریاستی صدر وریندر سچدیوا اور انچارج بیجینت جے پانڈا اور دیگر قائدین حکومت سازی کا دعویٰ پیش کرنے کے لیے لیفٹیننٹ گورنر وی کے سکسینہ کی رہائش گاہ کے لیے روانہ ہوئے۔جمعرات کو دوپہر 12.35 بجے، لیفٹیننٹ گورنر وی کے سکسینہ گپتا کو چیف منسٹر کے عہدے کا حلف دلائیں گے۔ اس کے بعد کابینہ کے ارکان کو حلف دلایا جائے گا۔ حلف برداری کی تقریب رام لیلا میدان میں منعقد کی جا رہی ہے۔
تقریب حلف برداری کی نظامت دہلی کے چیف سکریٹری کریں گے۔ وزیر اعظم نریندر مودی، بی جے پی کے قومی صدر جگت پرکاش نڈا، وزیر داخلہ امیت شاہ، مرکزی وزراء اور بی جے پی اور قومی جمہوری اتحاد کی حکومت والی ریاستوں کے چیف منسٹرس اور ڈپٹی چیف منسٹرس اور سرکردہ رہنما بھی تقریب میں شرکت کریں گے۔70 رکنی دہلی اسمبلی میں بی جے پی کو 48اور عام آدمی پارٹی کو 22 سیٹیں ملی ہیں۔
بھارتیہ جنتا پارٹی (بی جے پی) لیڈر ریکھا گپتا نے دہلی کی نئی چیف منسٹر منتخب ہونے پرپارٹی کی قیادت کا شکریہ ادا کیا ہے۔گپتا نے چہارشنبہ کے روز ’ایکس‘ پر کہا، مجھ پر اعتماد کرکے چیف منسٹرکے عہدے کی ذمہ داری دینے پر تمام اعلی قیادت کا دل سے شکریہ ادا کرتی ہوں۔ آپ کے اس اعتماد اور تعاون نے مجھے نئی توانائی اور تحریک دی ہے۔
میں وعدہ کرتی ہوں کہ دہلی کے ہر شہری کی فلاح و بہبود، بااختیار بنانے اور مجموعی طور پر ترقی کے لئے پوری ایمانداری اور لگن کے ساتھ کام کروں گی۔ دہلی کو نئی بلندیوں تک لے جانے کے اس اہم موقع کے لئے میں پوری طرح پرعزم ہوں۔غورطلب ہے کہ بی جے پی کی مقننہ پارٹی کی میٹنگ میں آج ریکھا گپتا کو قانون ساز پارٹی کا لیڈر منتخب کیا گیا۔ وہ کل دہلی کی چوتھی خاتون چیف منسٹر کی حیثیت سے حلف اٹھائیں گی۔
ہمیں فالو کریں
