مکہ مکرمہ ۔ کے این واصف
حرمین شریفین میں ماہ رمضان میں عازمین و زائرین کی تعداد ایام حج سے بھی زیادہ ہوجاتی ہے۔ اس کی تیاری کے لئے نائب گورنر مکہ مکرمہ شہزادہ مشعل بن عبدالعزیز کی سربراہی میں مرکزی حج کمیٹی نے رمضان المبارک 1446ھ مطابق 2025 کے دوران عمرہ زائرین کو فراہم کی جانے والی خدمات کی تیاریوں کا جائزہ لیا ہے۔
سعودی پریس ایجنسی کے مطابق وزارت حج و عمرہ نےعمرہ زائرین کے خیرمقدم کےحوالے سے تیاریوں سے آگاہ کیا۔ عمرہ کمپنیوں اور اداروں کو یکم ذی القعدہ سے قبل عمرہ زائرین کی واپسی کے شیڈول عمل کرنے کی ضرورت پر زور دیا گیا۔
کمیٹی کو رمضان سیزن میں مکہ میونسپلٹی کی تیاریوں کے حوالے سے بھی بریفنگ دی گئی۔ اس میں ماحولیاتی صفائی کی خدمات کے علاوہ دیکھ بھال کے منصوبے شامل ہیں۔ان تیاریوں کے علاوہ 1500 میٹر طویل شہزادہ محمد بن سلمان واکنگ ٹریک کے فٹ پاتھ کی بحالی، ڈسٹ بین، چوبیس گھنٹے کام کرنے والے 1500 سے زائد صفائی کارکنان کی فراہمی شامل ہے۔
مکہ مکرمہ کے داخلی راستوں کے علاوہ مرکزی علاقے کے اطراف ٹرانسپورٹ اسٹیشنوں پر بیرونی پارکنگ کے علاوہ عمرہ زائرین کے خیرمقدم کے لیے مسجدالجعرانہ اور مسجد عائشہ کے اطراف کے علاقوں کو بھی تیار کیا گیا ہے۔مسجد الحرام جنرل پریذیڈنسی نے رمضان آپریشنل پلان سے آگاہ کیا جس میں صفائی ستھرائی، افطار، رہنمائی، مسجد الحرام کے مختلف حصوں میں زمزم کی فراہمی، قالین، ویل چیئر، خوشبویات کا استعمال،ِ ماحولیاتی تحفظ، ترجمہ، اعتکاف اور دیگر امور شامل ہیں رمضان کے دوران ٹرانسپورٹیشن منصوبے سے بھی آگاہ کیا گیا۔
کمیٹی نے سعودی ہلال احمر اتھارٹی کی رمضان تیاریوں کا جائزہ بھی لیا جس میں بتایا گیا کہ 99 ایمبولینیں سینٹرز اور 75 ایمبولینیں موجود ہیں۔اجلاس میں عمرہ زائرین کو بہترین خدمات کی فراہمی کو یقینی بنانے کے لیے مسلسل کوششیں جاری رکھنے کا عزم کیا گیا۔
