حیدرآباد: تلنگانہ حکومت نے ذاتوں کے سروے میں حصہ لینے کا عوام کوایک اورموقع دیا ہے۔اس طرح اس سروے میں تفصیلات درج کروانے کی سہولت کااتوارکوآغازہوا۔
حکومت کا یہ اقدام ان الزامات کے بعد سامنے آیا جس میں کہاگیا تھا کہ ذاتوں کے سروے میں کئی افرادکونظراندازکردیاگیا ہے اورکئی افراداپنی تفصیلات درج کروانے سے قاصر رہے۔
ان الزامات پرردعمل ظاہرکرتے ہوئے حکومت نے ایسے افراد کے لئے ایک اورسہولت فراہم کی ہے جو سروے میں اپنی تفصیلات درج کروانے سے قاصررہے۔یہ سروے 28فروری تک جاری رہے گا جس کے ذریعہ ریاست میں 3,56,323 خاندانوں کی مردم شماری کی جائے گی ۔
سروے سے دور رہنے والے 3,56,000 سے زائد خاندان کو مردم شماری میں حصہ لینے کے لئے 3 طریقوں سے سروے کے عملہ سے رجوع ہوسکتے ہیں جن میں پہلا طریقہ ٹال فری نمبر پر کال کرتے ہوئے اپنے خاندان کا سروے کرواسکتے ہیں۔ اس کے لئے ریاست کے کسی بھی مقام سے صبح 9 بجے سے شام 5 بجے کے درمیان040-21111111 پر کال کیا جاسکتا ہے اور اپنی مردم شماری مکمل کروانے کی درخواست دیں۔
کال کی تصدیق کے بعد ایک نامزد عہدیدار اس بات کو یقینی بنائے گا کہ مردم شماری کرنے والا عملہ متعلقہ گھر کا دورہ کرے اور سروے مکمل کرے۔ دوسرا طریقہ پرجاپالانا سیوا کیندر پر جاکر سروے کروانا ہے۔ اس کے تحت قریب میں واقع پرجاپالانا سیواکیندر سے رجوع ہوتے ہوئے مردم شماری کا عمل مکمل کیا جاسکتا ہے۔
یہ کیندر دیہی علاقوں میں یم پی ڈی او کے دفاتر اور شہری علاقوں میں وارڈ دفاتر میں واقع ہیں۔ تربیت یافتہ عملہ وہاں موجود ہوگا جو عوام کو سروے فارم پر کرنے میں مدد کرے گا۔ تیسرا طریقہ آن لائن فارم ڈاون لوڈ کرتے ہوئے بھی انجام دیا جاسکتا ہے۔ اس کے لئے سروے فارمhttps:eeepcsurvey.cgg.gov.in
سے ڈاون لوڈ کیا جاسکتا ہے۔ فارم کو پر کرنے اور دستخط کرنے کے بعد اسے قریب میں واقع پرجاپالنا سیوا کیندر میں داخل کروایا جاسکتا ہے۔ تمام اضلاع کے کلکٹرس اور جی ایچ ایم سی کمشنر کو ہدایت کی گئی ہے کہ وہ اس عمل کو بغیر کسی رکاوٹ کے مکمل کریں اور ان تین طریقوں کے بارے میں عوام میں زیادہ سے زیادہ شعور بیدار کریں۔
ہمیں فالو کریں
