اسرائیلی وزیر اعظم نیتن یاہو کی اہلیہ مشکلوں میں، فوجداری جانچ ہوئی شروع

اسرائیل کے وزیر اعظم بنجامن نیتن یاہو کی اہلیہ سارہ مشکلوں میں پھنسی ہوئی نظر آ رہی ہیں۔ اطلاع کے مطابق اسرائیل کی پولیس نے ان کے خلاف فوجداری جانچ شروع کر دی ہے۔ یہ جانچ ان کے شوہر نیتن یاہو سے جڑے بدعنوانی کے الزامات سے جڑی ہوئی ہے۔ الزام لگایا جا رہا ہے کہ انہوں نے شوہر کے مقدمہ میں اہم گواہ کو دھمکانے کی کوشش کی تھی۔

اتوار کو اسٹیٹ اٹارنی کی طرف سے جاری ایک خط میں اطلاع دی گئی ہے کہ سارہ نیتن یاہو کے خلاف فوجداری جانچ چل رہی ہے۔ اسرائیل کی اپوزیشن رہنما ناما لاجمی کے نام یہ خط لکھا گیا تھا۔ خاص بات یہ ہے کہ لاجمی نے ہی الزام لگایا تھا کہ سارہ نیتن یاہو کے خلاف جاری مقدمہ سے جڑے شواہد کے ساتھ چھیڑ چھاڑ کرنے کی کوشش کی گئی ہے۔ انہوں نے اطلاع دی ہے کہ 26 دسمبر کو جانچ شروع ہوئی تھی۔

ایک ٹی وی شو میں الزام لگایا گیا تھا کہ سارہ نے شوہر کے مقدمے کے خاص گواہ کو دھمکانے کی کوشش کی تھی۔ الزام یہ بھی تھے کہ انہوں نے اٹارنی جنرل، ان کے معاون اور دیگر لوگوں کو احتجاجی مظاہرہ کے ذریعہ بھی پریشان کرنے کی کوشش کی تھی۔ اٹارنی دفتر سے اطلاع ملی ہے کہ اسرائیل کی پولیس معاملے کی جانچ کر رہی ہے، جس میں سائبر محکمہ بھی مدد کر رہا ہے۔

نیتن یاہو کے خلاف مئی 2020 میں ٹرائل شروع ہوا تھا۔ پہلے معاملے میں نیتن یاہو اور ان کی اہلیہ پر سیاسی فائدہ پہنچانے کے لیے 2 لاکھ 60 ہزار ڈالر سے زیادہ کی قیمتی چیزیں قبول کرنے کے الزام لگے تھے۔ ان میں زیور اور شراب سمیت کئی چیزیں شامل ہیں۔ خاص بات یہ ہے کہ نیتن یاہو اسرائیل کے پہلے ایسے وزیر اعظم ہیں جو عہدے پر رہتے ہوئے مقدمہ کا سامنا کر رہے ہیں۔