گوہاٹی: گوہاٹی میں راہول گاندھی کے خلاف ایک ایف آئی آر درج کی گئی ہے۔ ان پر ہندوستانی ریاست کے خلاف بغاوت پر اُکسانے کا الزام ہے۔
گوہاٹی کے ایک وکیل منجیت چیٹیا نے راہول گاندھی کے مبینہ بیان کا حوالہ دیتے ہوئے یہاں پان بازار پولیس اسٹیشن میں شکایت درج کرائی ہے۔
راہول نے مبینہ طور پر کہا تھا کہ بی جے پی اور آر ایس ایس نے ہر ادارہ پر قبضہ کرلیا ہے اور اب ہم بی جے پی، آر ایس ایس اور خود ہندوستانی ریاست سے مقابلہ کررہے ہیں۔
شکایت گزار نے کہا کہ قائد ِ اپوزیشن کے عہدہ پر فائز ایک شخص نے پبلک فورم میں یہ بیان دیا ہے اور یہ کوئی عام سیاسی ریمارک نہیں ہے۔
چیٹیا نے اپنی شکایت میں مزید کہا کہ اطلاع دینے والے کا یہ ماننا ہے کہ یہ ریمارکس ہندوستانی ریاست کی خودمختاری اور یکجہتی کو متاثر کرنے دانستہ منصوبے اور ارادے کے ساتھ کیے گئے ہیں تاکہ جمہوری طور پر منتخب مرکزی حکومت اور وزیر اعظم نریندر مودی کے خلاف بغاوت پر اُکسایا جاسکے۔
ہمیں فالو کریں
