پاکستان 190 ملین پاؤنڈ کیس: عمران خان کو 14 سال اور بشریٰ بی بی کو 7 سال قید کی سزا
نئی دہلی۔ پاکستان تحریک انصاف (پی ٹی آئی) کے بانی چیئرمین عمران خان کو 190 ملین پاؤنڈ کیس میں 14 سال قید اور 10 لاکھ روپے جرمانے کی سزا سنائی گئی ہے۔ ان کے ساتھ ان کی اہلیہ بشریٰ بی بی کو بھی 7 سال قید اور 5 لاکھ روپے جرمانہ عائد کیا گیا ہے۔ یہ فیصلہ اسلام آباد کی مقامی عدالت کے جج ناصر جاوید رانا نے اڈیالہ جیل میں سنایا۔
فیصلے کے دن عمران خان کو اڈیالہ جیل پہنچایا گیا جہاں بشریٰ بی بی، چیئرمین پی ٹی آئی کے وکیل بیرسٹر گوہر، شعیب شاہین، سلمان اکرم راجہ اور دیگر قانونی ماہرین بھی موجود تھے۔ جج نے اپنے فیصلے میں کہا کہ اگر عمران خان جرمانہ ادا نہیں کرتے تو انہیں مزید 6 ماہ قید کی سزا ہو گی جبکہ بشریٰ بی بی اگر جرمانہ ادا نہیں کرتیں تو انہیں 3 ماہ اضافی جیل کی سزا کا سامنا کرنا پڑے گا۔
عدالت نے اس کے علاوہ القادر ٹرسٹ یونیورسٹی کو حکومتی تحویل میں دینے کا بھی حکم دیا۔ فیصلہ سنانے کے فوراً بعد بشریٰ بی بی کو کمرہ عدالت سے گرفتار کر لیا گیا۔ جج ناصر جاوید رانا فیصلہ سنانے کے بعد عدالت سے روانہ ہو گئے۔
عمران خان اور بشریٰ بی بی کی قانونی ٹیم نے فیصلے کے خلاف اپیل کرنے کا اعلان کیا ہے۔
