حیدرآباد: ریاست اترپردیش کے پریاگ راج میں جاری مہاکمبھ میلہ سے واپسی کے دوران بس کو آگ لگ گئی جس کے نتیجہ میں تلنگانہ کا ایک شخص زندہ جھلس کر ہلاک ہوگیا۔یہ واقعہ متھرا کے ورانداون کے قریب پیش آیا۔ذرائع کے مطابق اس جھلس کرہلاک ہونے والے شخص کی شناخت تلنگانہ کے ضلع نرمل کے پالسی گاوں کے رہنے والے 60سالہ ایس دروپد کے طورپر کی گئی ہے۔
سمجھاجاتا ہے کہ یہ ضعیف شخص بس میں سگریٹ نوشی کررہاتھا جس کی وجہ سے یہ بس شعلہ پوش ہوگئی۔اس واقعہ کی اطلاع ملتے ہی فائربریگیڈ کے عملہ نے وہاں پہنچ کرآگ پر قابو پایا۔تلنگانہ کے مدھول کے رکن اسمبلی راما راو پاٹل نے کہا کہ ان یاتریوں کو واپس لانے کے انتظامات کئے جارہے ہیں۔انہوں نے متھرا کے کلکٹر اور ایس پی سے بھی اس سلسلہ میں بات کی۔انہوں نے کہاکہ مسافرین کو غذا اوررہنے کی سہولت فراہم کی گئی ہے۔
انہوں نے کہاکہ اس واقعہ میں یاتریوں کا سامان جل کر مکمل طورپر خاکسترہوگیا۔ اس واقعہ کے ساتھ ہی مہلوک یاتری کے ارکان خاندان پر غم کا پہاڑ ٹوٹ پڑا۔
