سہارا منسٹریس ایجوکیشن این آر آئی فاؤنڈیشن کی جانب سے کھمم میں مستحق طلباء اور معذورین کے لیے 4 لاکھ روپے کی لاگت سے امداد فراہم کی گئی۔ اس امداد میں 8 لیپ ٹاپس، 4 سائیکلز، معذورین کے لیے ٹرائی سائیکلز، اور رگھونات پالم منڈل کے ایک اسکول کے طلباء کے لیے سائنسی نمائش کے انعقاد کے لیے 20 ہزار روپے کا چیک شامل تھا۔ یہ امداد کھمم کے ضلع کلکٹر مذمل خان کے ہاتھوں تقسیم کی گئی۔
اس موقع پر خطاب کرتے ہوئے کلکٹر مذمل خان نے سہارا منسٹریس ایجوکیشن این آر آئی فاؤنڈیشن کی اس انسان دوست کاوش کی تعریف کی۔ انہوں نے کہا کہ غریب اور مستحق طلباء کی تعلیمی امداد ایک عظیم عمل ہے، اور اس طرح کی مدد ہمیشہ یاد رکھی جائے گی۔ کلکٹر نے تعلیم کی اہمیت پر زور دیتے ہوئے کہا کہ تعلیم ہی طلباء کے مستقبل کو روشن کرتی ہے۔
کلکٹر مذمل خان نے کھمم ضلع میں مختلف تنظیموں کی سماجی اور فلاحی خدمات کی تعریف کرتے ہوئے کہا کہ انہیں اس ضلع میں کلکٹر کی حیثیت سے خدمات انجام دینے پر فخر محسوس ہوتا ہے۔ اس تقریب میں فاؤنڈیشن کے عہدیداروں نے طلباء کو بہتر تعلیمی مواقع فراہم کرنے کے عزم کا اعادہ کیا۔ امداد کی اس تقسیم سے سینکڑوں مستحق افراد کو فائدہ پہنچا، اور تقریب میں موجود لوگوں نے اس کوشش کو خوب سراہا۔
