دہلی میں شدید کہرے نے زندگی متاثر کر دی۔ ٹرینوں کی آمد و رفت میں تاخیر، پروازوں پر ممکنہ اثرات۔ موسم مزید سرد اور بارش کا امکان۔ شمالی ہندوستان میں بگڑتے موسم کی وارننگ جاری
دہلی میں شدید کہرا
نئی دہلی: سال کا تیسرا دن دہلی اور شمالی ہندوستان کے دیگر حصوں میں شدید کہرے کے ساتھ شروع ہوا۔ آج دہلی میں سیزن کا سب سے زیادہ کہرا دیکھا گیا، جس سے سڑکوں، درختوں اور دیگر مناظر کا نظارہ ممکن نہیں رہا۔ ہائی ویز پر کوہرے کی شدت زیادہ ہے، جبکہ رہائشی علاقوں میں کہرا نسبتاً کم ہے۔
کہرے کی وجہ سے ٹرینوں کی رفتار کم ہو گئی ہے اور فلائٹس پر بھی ممکنہ اثرات کا خدشہ ہے۔ دہلی ایئرپورٹ کے مطابق، اگرچہ ویژبیلیٹی بہت کم ہے لیکن فلائٹس اپنے شیڈول کے مطابق چل رہی ہیں۔ تاہم، مسافروں کو اپنی فلائٹ کے بارے میں ایئرلائن سے رابطہ رکھنے کی ہدایت دی گئی ہے۔
محکمہ موسمیات نے دہلی میں آج شدید کہرے کے ساتھ کم سے کم درجہ حرارت 8 ڈگری اور زیادہ سے زیادہ 17 ڈگری سیلسیس رہنے کی پیش گوئی کی ہے۔ آنے والے دنوں میں سردی مزید بڑھنے کا امکان ہے اور ویک اینڈ پر مغربی ہواؤں کے اثر سے ہلکی بارش کی بھی توقع ہے، جس کے باعث درجہ حرارت میں قدرے اضافہ ممکن ہے۔
ہماچل پردیش میں 4 سے 7 جنوری کے درمیان برفباری، جبکہ 5 اور 6 جنوری کو شدید بارش کی پیش گوئی کی گئی ہے۔ جموں و کشمیر، لداخ، گلگت بلتستان اور مظفرآباد میں 5 جنوری کو بھاری برفباری کا امکان ظاہر کیا گیا ہے۔ دہلی سمیت شمالی میدانوں میں 4 سے 6 جنوری تک ہلکی بارش ہو سکتی ہے۔
موسمی حالات پر نظر رکھنے والی ایک پرائیویٹ ایجنسی اسکائی میٹ کے مطابق، آج مغربی ہمالیائی علاقوں میں ہلکی سے درمیانی بارش اور برفباری متوقع ہے۔ تمل ناڈو کے ساحلی علاقوں میں بھی کچھ مقامات پر ہلکی بارش ہو سکتی ہے۔ پنجاب، ہریانہ، اتر پردیش اور راجستھان کے کچھ حصوں میں شدید کہرا رہنے کی پیش گوئی کی گئی ہے۔
