نئی دہلی: نئے سال کے آغاز کے ساتھ ہی ذاتی مالیات اور بینکنگ سے متعلق کئی اہم تبدیلیاں نافذ ہوں گی۔ یکم جنوری 2025 سے کئی ایسے قوانین لاگو ہوں گے، جن کا براہ راست اثر آپ کی روزمرہ کی زندگی اور مالی منصوبہ بندی پر پڑے گا۔ ان تبدیلیوں میں ایل پی جی سلنڈر کی قیمتوں سے لے کر پنشن اور یو پی آئی خدمات تک کے قوانین شامل ہیں۔ آئیے ان تبدیلیوں کے بارے میں تفصیل سے جانتے ہیں۔
ایل پی جی سلنڈر کی قیمتوں میں تبدیلی
ہر ماہ کی ابتدا میں حکومت ایل پی جی سلنڈر کی قیمتوں میں تبدیلی کرتی ہے۔ اس بار بھی 1 جنوری 2025 کو قیمتوں میں تبدیلی متوقع ہے۔ 14 کلو کا گھریلو سلنڈر طویل عرصے سے مستحکم رہا ہے، لیکن کمرشل سلنڈر کی قیمتوں میں اتار چڑھاؤ دیکھنے کو ملا ہے۔
کاروں کی قیمتوں میں اضافہ
اگر آپ گاڑی خریدنے کا سوچ رہے ہیں، تو یکم جنوری سے آپ کو زیادہ خرچ آسکتا ہے۔ اہم آٹو کمپنیوں جیسے ماروتی سوزوکی، ہیونڈائی، مہندرا، اور بی ایم ڈبلیو نے گاڑیوں کی قیمتوں میں 3% تک اضافے کا اعلان کیا ہے۔
راشن کارڈ کیلئے ای-کے وائی سی ضروری
حکومت نے راشن کارڈ ہولڈرز کیلئے ای-کے وائی سی کو لازمی قرار دے دیا ہے۔ 31 دسمبر 2024 تک ای-کے وائی سی مکمل نہ کرنے والے راشن کارڈ 1 جنوری 2025 سے منسوخ کر دیے جائیں گے۔
پنشن نکالنے کے قوانین میں تبدیلی
ای پی ایف او (EPFO) نے پنشنرز کے لیے قوانین کو آسان بنایا ہے۔ اب وہ کسی بھی بینک سے اپنی پنشن نکال سکتے ہیں، اور اس کیلئے اضافی تصدیق کی ضرورت نہیں ہوگی۔
ای پی ایف او کے ممبرز کیلئے اے ٹی ایم سہولت
حکومت ای پی ایف او کے تحت رجسٹرڈ ملازمین کیلئے اے ٹی ایم کارڈ کی سہولت فراہم کرنے کی منصوبہ بندی کر رہی ہے، جس سے ملازمین اپنے پی ایف اکاؤنٹ سے آسانی سے پیسے نکال سکیں گے۔
فیچر فون صارفین کیلئے یو پی آئی کی حد میں اضافہ
یو پی آئی 123 پے سروس کے تحت فیچر فون صارفین اب 10,000 روپے تک کی ادائیگی کر سکیں گے، جب کہ پہلے یہ حد 5,000 روپے تھی۔
فکسڈ ڈپازٹ کے نئے قوانین
آر بی آئی (RBI) نے این بی ایف سیز اور ایچ ایف سیز کے لیے فکسڈ ڈپازٹ سے متعلق قوانین میں تبدیلی کی ہے۔ یہ قوانین 1 جنوری 2025 سے نافذ ہوں گے اور ڈپازٹ کی حفاظت کو یقینی بنائیں گے۔
امریکی ویزا قوانین میں تبدیلی
ہندوستان میں امریکی سفارت خانہ یکم جنوری 2025 سے نان امیگرینٹ ویزا کے لیے ایک بار اپوائنٹمنٹ دوبارہ شیڈول کرنے کی سہولت دے گا۔ اس کے بعد دوبارہ شیڈول کرنے پر فیس وصول کی جائے گی۔
سینسیکس اور بینکنگ ڈیریویٹیو کانٹریکٹس کی نئی تاریخیں
بی ایس ای نے اعلان کیا ہے کہ 1 جنوری 2025 سے سینسیکس اور بینکیکس کے ہفتہ وار کانٹریکٹس ہر منگل کو ختم ہوں گے، جو پہلے جمعہ کو ختم ہوتے تھے۔
جنوری میں 15 دن تک بینک بند رہیں گے
جنوری میں کل 15 دن بینک بند رہیں گے۔ ان میں اتوار، دوسرے اور چوتھے ہفتے کا ہفتہ، اور تعطیلات پر ہونے والی چھٹیاں شامل ہیں۔ تاہم، آر بی آئی کی سرکاری تعطیلات کی فہرست ابھی جاری نہیں کی گئی ہے۔
یکم جنوری 2025 سے نافذ ہونے والے یہ قوانین آپ کی جیب پر براہ راست اثر ڈالیں گے۔ لہٰذا، وقت پر تیاری کریں اور اپنی مالی منصوبہ بندی کو بہتر بنائیں۔
ہمیں فالو کریں
