کھمم کے پولیس کمشنر سنیل دت نے کمشنریٹ میں منعقدہ سالانہ صحافتی کانفرنس کے دوران ضلع میں جرائم کے اعداد و شمار پیش کیے۔ انہوں نے بتایا کہ سال 2024 میں مقدمات کے اندراج میں 16 فیصد اضافہ ہوا ہے۔ سال 2023 میں 7667 مقدمات درج کیے گئے تھے، جبکہ 2024 میں یہ تعداد بڑھ کر 8873 ہو گئی۔
کمشنر نے نشاندہی کی کہ گھریلو تنازعات اور جائیداد کے جھگڑوں میں بھی گزشتہ سال کے مقابلے میں اضافہ دیکھنے کو ملا۔ انہوں نے کہا کہ ضلع بھر میں سی سی ٹی وی کیمروں کی تنصیب میں اضافے کی وجہ سے بروقت مجرموں کو پکڑنے میں مدد ملی ہے۔ چوری اور ڈکیتی کے واقعات میں 80 فیصد چوری شدہ سامان کو برآمد کیا گیا ہے، جو کہ ایک بڑی کامیابی ہے۔
خواتین کے تحفظ کے حوالے سے پولیس نے شی ٹیموں کو متحرک رکھا ہے، جن کی وجہ سے خواتین کے خلاف جرائم میں کمی آئی ہے۔ پولیس کمشنر نے جرائم کی روک تھام کے لیے مزید اقدامات کا وعدہ کیا۔
اس موقع پر ضلع کے اے سی پیز، سی آئیز اور دیگر پولیس عہدیداران بھی موجود تھے۔ پولیس نے عوام سے اپیل کی کہ وہ جرائم کی روک تھام میں تعاون کریں اور کسی بھی مشکوک سرگرمی کی فوری اطلاع دیں۔
