مدھیہ پردیش میں کرسمس پر اسکولی بچے سانتا کلاز نہیں بن سکیں گے، والدین سے لینی پڑے گی اجازت

مدھیہ پردیش میں 25 دسمبر کو کرسمس کے تہوار سے پہلے ایک حکم جاری کیا گیا ہے۔ چائلڈ رائٹس پروٹیکشن کمیشن نے حکم دیا ہے کہ اسکولوں کو مسیحی تہواروں کے موقع پر طلباء کو سانتا کلاز بنانے کی اجازت دینے سے پہلے والدین سے تحریری اجازت لینا ہوگی۔ چائلڈ کمیشن کا کہنا تھا کہ یہ قدم کسی ناخوشگوار صورتحال سے بچنے کے لیے اٹھایا گیا ہے۔

درحقیقت کرسمس کے موقع پر طلباء سانتا کلاز کا لباس زیب تن کر کےا سکولوں میں منعقد ہونے والے پروگراموں میں شرکت کرتے ہیں۔ لیکن مدھیہ پردیش کے چائلڈ رائٹس پروٹیکشن کمیشن نے اسکول ایجوکیشن ڈپارٹمنٹ اور ریاست کے تمام ضلع کلکٹروں کو ایک خط جاری کیا ہے، جس میں ہدایت کی گئی ہے کہ کوئی بھی اسکول کرسمس کے تہوار کے دوران طلباء کو سانتا کلاز کا لباس پہننے کو کہے  تو اس کو پہلے طلباء کے والدین سے تحریری طور پر اجازت لینی ہوگی۔

اب اس حکم کے بعد دیکھنا یہ ہے کہ کرسمس کے تہوار کے پیش نظر بچوں کو سانتا لباس پہنانے کی روایت پر کوئی اثر پڑتا ہے یا نہیں۔ آپ کو بتاتے چلیں کہ اسی طرح کا ایک حکم سال 2023 میں بھی جاری کیا گیا تھا، جس میں اسکولوں میں بچوں کو کسی بھی قسم کا لباس پہننے پر مجبور کرنے سے منع کیا گیا تھا۔ اس کے لیے اسکولوں کو والدین سے تحریری اجازت لینے کا بھی حکم دیا گیا تھا۔