روہتانگ سمیت بلند چوٹیوں پر ہوئی برفباری سے سردی میں اضافہ

ہماچل پردیش کے لاہول اسپتی اور کلّو اضلاع میں ایک ہفتے کے بعد موسم بدل گیا ہے۔ روہتانگ سمیت اونچی چوٹیوں پر اتوار کی صبح ہلکی برف گری۔ تاہم، منالی اور کیلانگ کے درمیان گاڑیوں کی آمدورفت جاری ہے۔ پہاڑوں پر ہلکی برفباری کے بعد وادی میں شدید سردی محسوس کی جارہی ہے۔ کلو میں صبح سے ہی ہلکے بادل چھائے ہوئے ہیں۔ باغبان اور کسان بارش اور برف باری کی توقع کر رہے ہیں۔

ہماچل میں انتہائی سردی ہے۔ ریاست کے پانچ اضلاع میں پارہ منفی 14 ڈگری سیلسیس کے ساتھ صفر سے نیچے چلا گیا ہے۔ میدانی علاقوں میں دھند چھائی ہوئی ہے۔ دھند کی وجہ سے کلّو میں ہفتہ کو تیسرے دن بھی پروازیں نہیں چل سکیں۔

محکمہ موسمیات کے مطابق آج اور کل ہماچل کے بالائی علاقوں میں برف باری کا امکان ہے لیکن 27 دسمبر کو پوری ریاست میں بارش اور کئی علاقوں میں برفباری کے امکانات ہیں۔

ریاست ہماچل پردیش میں سردی کی لہر اگلے چھ دنوں تک جاری رہے گی۔ میدانی علاقوں میں 24 اور 25 تاریخ کو شدید دھند کا الرٹ جاری کر دیا گیا ہے۔ منڈی، کنور، لاہول اسپتی اور چمبا کے کئی علاقوں میں پارہ صفر سے نیچے پہنچ گیا ہے۔ ہفتہ کو تابون میں اس موسم کا سب سے کم درجہ حرارت منفی 14 ڈگری ریکارڈ کیا گیا ہے۔ اونا، ہمیر پور اور بلاس پور میں دھند کی وجہ سے معمولات زندگی متاثر ہو رہے ہیں۔ منالی، کلپا، نرکنڈہ اور سیسو سمیت کچھ اونچی جگہوں پر 23 اور 24 دسمبر کو بارش اور برف باری ہو سکتی ہے۔