[]
ممبئی: جنوبی ممبئی کے ایک فلیٹ میں تین ڈاکوؤں نے 70 سالہ خاتون اور اس کے شوہر کا منہ ٹیپ سے بند کردیا اور ان کے ہاتھ باندھ دیے جس سے خاتون کی موت ہوگئی۔
بعد ازاں ڈاکو سونا اور دیگر قیمتی اشیاء لوٹ کر فرار ہوگئے۔ یہ واردات اتوار کی صبح تاردیو علاقہ میں واقع یوسف منزل میں پیش آئی۔
مقتول سریکھا اگروال اور ان کے 75سالہ شوہر مدن موہن اگروال کے علاوہ اس فلیٹ میں کوئی نہیں رہتا تھا۔
آج صبح 6بجے جب یہ جوڑا اپنے فلیٹ سے نکل رہا تھا تو تین ڈاکو وہاں پہنچ گئے۔ انہوں نے دونوں کے منہ پر ٹیپ چپکایا اور ان کے ہاتھ پیر باندھ دیے۔
اس کے بعد وہ طلائی زیورات، گھڑیاں اور نقد رقم لے کر فرار ہوگئے۔ تاردیو پولیس اسٹیشن کے ایک عہدیدار نے یہ بات کہی۔ ملزمین کے وہاں سے جانے کے بعد خاتون کا شوہر کسی طرح فلیٹ کے دروازے تک پہنچا اور الارم کا بٹن دبایا۔
بعد ازاں ہاؤزنگ سوسائٹی کے کسی فرد نے ان کی مدد کی۔ پولیس عہدیدار نے کہا کہ خاتون بے ہوش پائی گئی جسے دواخانہ لے جایا گیا جہاں ڈاکٹروں نے اسے مردہ قرار دیا۔“ اس ضمن میں ایک مقدمہ درج کرکے تحقیقات کا آغاز کردیا گیا۔
