[]
مہر خبررساں ایجنسی کی رپورٹ کے مطابق، ایران کی یورینیم افزودگی کے عمل کے بارے میں ایک رپورٹ کے بعد، ذرائع نے ہفتے کے روز فارس نیوز ایجنسی کو بتایا کہ اسلامی جمہوریہ ایران کی پرامن جوہری سرگرمیاں تمام شعبوں میں جوہری توانائی ایجنسی (AEOI) کے سابقہ منصوبوں کی بنیاد پر بغیر کسی رکاوٹ کے جاری ہیں۔
ذریعہ نے مزید کہا کہ پارلیمنٹ کے قانون جسے پابندیوں کا مقابلہ کرنے کے لیے اسٹریٹجک ایکشن پلان کا نام دیا گیا ہے پر بھی سختی سے عمل درآمد کیا جا رہا ہے۔
ایرانی پارلیمنٹ نے دسمبر 2020 کو پابندیوں کا مقابلہ کرنے کے لیے اسٹریٹجک ایکشن پلان کو منظور کیا تھا تاکہ امریکہ اور اس کے مغربی اتحادیوں کی جانب سے ایران پر عائد غیر قانونی پابندیوں کا مقابلہ کیا جا سکے۔
اس قانون میں ایرانی انتظامیہ سے IAEA کے معائنے کو محدود کرنے اور 2015 کے امریکہ کے ترک کردہ جوہری معاہدے کے تحت طے شدہ حدود سے باہر ملک کے جوہری پروگرام کی ترقی کو تیز کرنے کا مطالبہ کیا گیا ہے۔
وال اسٹریٹ جرنل نے جمعہ کے روز اس معاملے سے واقف ذرائع کا حوالہ دیتے ہوئے دعویٰ کیا کہ ایران نے انتہائی افزودہ یورینیم کے ذخیرہ میں کافی سست روی کا مظاہرہ کیا ہے، جسے اس موسم خزاں میں جوہری مسائل پر امریکہ کے ساتھ مذاکرات کی بحالی کی جانب ایک قدم کے طور پر دیکھا جا سکتا ہے۔
وال سٹریٹ جرنل کے مطابق امریکی انتظامیہ کے اہلکاروں نے تہران کو پہلے بتایا تھا کہ اگر تہران موسم گرما کے دوران اپنے جوہری پروگرام کو کم کرنے کے لیے ٹھوس اقدامات کرے تو وہ ممکنہ طور پر ان مذاکرات کو دوبارہ شروع کرنے کے لیے تیار ہیں جو گذشتہ موسم خزاں میں روکے گئے تھے۔
اس کے باوجود اخبار نے دعویٰ کیا کہ ایران کے پاس اب بھی 60 فیصد افزودہ یورینیم کا بڑا ذخیرہ موجود ہے جو جوہری آلات بنانے کے لیے کافی ہو سکتا ہے۔
تاہم تہران نے ہمیشہ کہا ہے کہ اس کا جوہری پروگرام خالصتاً پرامن مقاصد کے لیے ہے اور اسلامی جمہوریہ کا جوہری ہتھیار تیار کرنے کا کوئی ارادہ نہیں ہے۔
رہبر معظم انقلاب اسلامی حضرت آیت اللہ العظمی سید علی خامنہ ای نے ایک فتویٰ (مذہبی فرمان) بھی جاری کیا ہے جس میں اعلان کیا ہے کہ وسیع پیمانے پر مہلک جوہری ہتھیاروں کا حصول استعمال اسلامی اصولوں کی خلاف ورزی ہے اور اس لیے یہ حرام ہیں۔
خیال رہے کہ جمعرات کو یہ اطلاع ملی تھی کہ امریکہ اور ایران کے درمیان قیدیوں کے تبادلے پر معاہدہ ہو گیا ہے۔ معاہدے کے تحت تہران کو اپنے منجمد امریکی اثاثوں سے 6 بلین ڈالر ملیں گے۔
