سفیر نیوز
وزیراعلیٰ اے ریونت ریڈی نے ممبئی میں پریس کانفرنسکے دوران مہاراشٹرا کے عوام کو تلنگانہ حکومت کی جانب سے نافذ شدہ اسکیموں کے بارے میں آگاہ کیا اور بی جے پی کی تنقید کا جواب دیا۔ ریڈی نے کہا کہ مرکزی اور مہاراشٹرا حکومت کسانوں کی فلاح سے غافل ہیں اور بتایا کہ تلنگانہ میں 2 لاکھ روپے کا کسان قرض معافی اسکیم کے تحت لاکھوں کسانوں کے قرضے معاف کیے جا چکے ہیں۔ انہوں نے الزام لگایا کہ پی ایم مودی نے تلنگانہ میں کانگریس کی ضمانتوں پر جھوٹ پھیلانے کی کوشش کی، لیکن کانگریس حکومت حقیقت پر مبنی اعداد و شمار فراہم کرنے کو تیار ہے۔
ریڈی نے دیگر عوامی اسکیموں کا بھی ذکر کیا، جیسے کہ 50 ہزار سرکاری نوکریوں کی فراہمی، 500 روپے میں گیس سلنڈر، اور 200 یونٹ مفت بجلی، جس سے لاکھوں لوگ مستفید ہو رہے ہیں۔ انہوں نے ذات پات کی مردم شماری پر بھی روشنی ڈالی اور مطالبہ کیا کہ 2025 کی مردم شماری میں اسے شامل کیا جائے۔
مہاراشٹرا کے تاریخی کردار اور عظیم شخصیات کو یاد کرتے ہوئے، ریڈی نے مودی پر الزام عائد کیا کہ انہوں نے 17 بڑے پروجیکٹ گجرات منتقل کیے، جو کہ مہاراشٹرا میں آنے تھے۔ ریڈی نے عوام سے اپیل کی کہ وہ بی جے پی کو انتخابات میں شکست دے کر دھوکہ دہی کا جواب دیں۔
