[]
نئی دہلی: عام آدمی پارٹی (عآپ) کی لیڈر اور دہلی کے وزیر تعلیم آتشی نے دعویٰ کیا کہ لوک سبھا انتخابات سے قبل انفورسمنٹ ڈائریکٹوریٹ (ای ڈی) خود انہیں، سوربھ بھاردواج، درگیش پاٹھک اور راگھو چڈھا کو گرفتار کرے گی۔
دہلی کابینہ کے وزیر آتشی نے آج یہاں دعویٰ کیا کہ بی جے پی نے انہیں اپنے انتہائی قریبی شخص کے ذریعے بی جے پی میں شامل ہونے کا پیغام بھیجا ہے۔ انہیں کہا گیا کہ وہ بی جے پی میں شامل ہو کر اپنا سیاسی کریئر بچائیں۔
اگر ایسا نہیں ہوا تو انہيں ای ڈی آئندہ مہینے میں گرفتار کر لے گی۔ ان کے دعوے کے مطابق ان کے ایک قریبی شخص نے کہا کہ وزیر اعظم نریندر مودی اور بی جے پی نے اپنا ذہن بنا لیا ہے کہ وہ عام آدمی پارٹی اور اس کے تمام لیڈروں کو کچل کر ختم کرنا چاہتے ہیں۔
انہوں نے کہا کہ پہلے AAP کے تمام سرکردہ لیڈروں کو گرفتار کیا گیا ہے۔ اب بی جے پی آنے والے دو مہینے میں ہونے والے لوک سبھا انتخابات سے پہلے عام آدمی پارٹی کے مزید چار لیڈروں کو گرفتار کروانے جا رہی ہے۔ ان میں وہ خود، سوربھ بھاردواج، درگیش پاٹھک اور راگھو چڈھا شامل ہیں۔
آتشی نے کہا کہ بی جے پی کو توقع تھی کہ مسٹر کیجریوال کی گرفتاری کے بعد عام آدمی پارٹی ٹوٹ جائے گی اور اس کا حوصلہ ٹوٹ جائے گا۔ انہوں نے کہا کہ اتوار کے روز رام لیلا میدان میں ہونے والی ریلی اور دس دنوں تک سڑکوں پر جدوجہد کے بعد انہیں لگا کہ یہ کافی نہیں ہے، اس لئے آنے والے دنوں میں باقی چار بڑے لیڈروں کو جیل میں ڈال دیا جائے گا۔
انہوں نے کہا، “آنے والے چند دنوں میں، ان کے اور ان کے رشتہ داروں کے گھر پر ای ڈی کا چھاپہ مارا جائے گا۔ “اس کے بعد، ہم سب کو سمن بھیجے جائیں گے اور اس کے فوراً بعد ہمیں گرفتار کر لیا جائے گا۔”
AAP لیڈر نے کہا، ‘میں بی جے پی کو بتانا چاہتی ہوں کہ ہم آپ کی دھمکیوں سے نہیں ڈرتے ہیں۔ ہم اروند کیجریوال کے سپاہی ہیں، بھگت سنگھ کے شاگرد ہیں۔ جب تک ہر AAP لیڈر، ہر ایم ایل اے اور ہر کارکن کی آخری سانس باقی ہے، ہم ملک اور آئین کو بچانے کے لیے جدوجہد کرتے رہیں گے۔
ہمیں فالو کریں
