[]
حیدرآباد، 15 فروری ( اردولیکس) تلنگانہ ہائی کورٹ میں بی آر ایس قائدین شراون اور ستیہ نارائنا کی طرف سے دائر الگ الگ درخواستوں پر بحث مکمل ہو گئی جس میں گورنر کوٹہ کے تحت ایم ایل سی کی تقرری کے لئے سابقہ کے سی آر کابینہ کی سفارشات کو مسترد کرنے گورنر کے فیصلے کو چیلنج کیا گیا ہے۔
چیف جسٹس آلوک اراد اور جسٹس جے انیل کمار کی بنچ نے فیصلہ محفوظ کرنے کا اعلان کیا۔ آج کی سماعت میں ستیہ نارائنا کے سینئر ایڈوکیٹ میور ریڈی نے دلیل دی کہ اگر کابینہ ایم ایل سی کے تقرری کو منظوری دینے سے مطمئن ہے تو گورنر کو ناموں کو منظوری دینے کے علاوہ کوئی چارہ نہیں ہوگا۔ انہوں نے کہا کہ ایم ایل سی کی تقرری کے معاملے میں جو بھی ہوتا ہے، اس کی ذمہ داری کابینہ کی ہوتی ہے۔ انہوں نے ستیہ نارائنا کی نامزدگی کو مسترد کرنے کو امتیازی سلوک اور تعصب کا عمل قرار دیا۔ انہوں نے کہا کہ کابینہ کے فیصلوں کی ذمہ داری وزراء کونسل پر عائد ہوتی ہے۔ انہوں نے کہا کہ گورنر کو کابینہ کے فیصلے کو مسترد کرنے کا کوئی اختیار نہیں ہے۔ انہوں نے کہا کہ گورنر اپنی ذمہ داریاں آئین کی حدود میں رہ کر ادا کریں اور ذاتی رائے کی بنیاد پر فیصلے نہ کریں۔ انہوں نے کہا کہ گورنر کے پاس کابینہ کی سفارشات کو مسترد کرنے کا کوئی اختیار نہیں ہے اور اگر کوئی اعتراض ہے تو سفارشات پر نظر ثانی کے لیے حکومت کو بھیجی جا سکتی ہے۔ یہ غلط کیا گیا کہ سفارشات واپس نہیں بھیجی گئیں اور غیر آئینی طور پر مسترد کر دی گئیں اور زور دیا گیا کہ اس کارروائی کو عام مسئلہ نہ سمجھا جائے بلکہ ایک نادر خصوصی کیس کے طور پر سمجھا جائے۔ یہ ایک خاص معاملہ ہے۔
اگر گورنر شراون کو سیاسی وابستگی کی بنیاد پر مسترد کرتے ہیں تو وہ پروفیسر کودنڈارام کی نامزدگی کو کس طرح منظور کرتے ہیں، جن کی حال ہی میں کابینہ نے سفارش کی تھی۔ کودنڈارام معاملے میں گورنر کی منظوری اس بات کا ثبوت ہے کہ گورنر کی کارروائی امتیازی ہے۔ ہائی کورٹ نے دلائل مکمل ہونے پر فیصلہ محفوظ کرنے کا اعلان کیا ہے۔
