[]
ریاض ۔ کے این واصف
حرمین شریفین میں پانی، بجلی کی سپلائی ہو یا صفائی وغیرہ کے انتظامات ہمیشہ بے جھول اور بےمثال ہیں۔ حرم مکی میں بجلی کی فراہمی سے متعلق تفصیلات جاری کی گئی ہیں جو پڑھنے سے تعلق رکھتی ہیں۔
ادارہ امور حرمین شریفین کا کہنا ہے کہ مسجد الحرام میں بلا تعطل بجلی کی فراہمی کویقینی بنانے کے لیے جملہ وسائل بروئے کار لائے جاتے ہیں۔مقامی میڈیا کے مطابق حرم مکی الشریف میں بجلی کی فراہمی کے حوالے سے ادارہ امور حرمین شریفین کا کہنا تھا کہ مسجد الحرام میں مختلف آلات اور لائٹوں وغیرہ کو مسلسل رواں رکھنے کےلیے متعدد پاوراسٹیشنز کام کرتے ہیں جن کی یومیہ بنیاد پر دیکھ بھال کی جاتی ہے۔
ادارے کا مزید کہنا تھا کہ مسجد الحرام کی تیسری توسیع کے دوران 12 مرکزی اور ذیلی پاور ہاؤسز کی سہولت مہیا کی گئی ہے۔مسجد الحرام میں بجلی کے ڈھائی لاکھ آلات جن میں برقی سیڑھیاں (ایسکیلیٹرز)، لفٹیں اور کولنگ سسٹم شامل ہیں کے لیے پاورجینریٹرز کا خصوصی انتظام ہے جو کسی بھی ہنگامی ضرورت پراستعمال کیے جاسکتے ہیں۔
ادارہ امور حرمین کا مزید کہنا تھا کہ مسجد الحرام کے مختلف مقامات پر بجلی کی مستقل فراہمی کو یقینی بنانے کےلیے 15 یو پی ایس بھی نصب کیے گئے ہیں ۔واضح رہے مسجد الحرام میں باقاعدہ طورپر بجلی کی فراہمی 1373ھ مطابق 1953 میں شاہ عبدالعزیز کی جانب سے کی گئی تھی جس کی مدد سے ساڑھے سات لاکھ مربع میٹر کے رقبے پرروشنی کا انتطام کیا گیا تھا۔
