مودی سب سے بڑے شنکراچاریہ بن گئے! ہم منی پور کے مندر جائیں گے، کیا پی ایم وہاں سر جھکائیں گے؟ سنجے راؤت

ممبئی: شیوسینا (یو بی ٹی) کے سینئر لیڈر سنجے راؤت نے ایودھیا میں رام مندر کی ’پران پرتشٹھا‘ تقریب کے حوالہ سے وزیر اعظم نریندر مودی پر تنقید کی ہے۔ انہوں نے کہا ہے کہ وہ لوگ (ادھو ٹھاکرے گروپ کے شیوسینک) تو تشدد زدہ شمال مشرق کے منی پور میں بنے رام مندر میں جائیں گے۔ مہاراشٹر کے سابق سی ایم ٹھاکرے وہاں پوجا ارچنا کریں گے مگر کیا پی ایم مودی وہاں جا کر سر جھکائیں گے؟

راؤت نے مزید الزام لگایا کہ مودی اور بی جے پی نے شیو سینا (ادھو دھڑے) کا پروگرام دیکھ کر (مندر سے متعلق پروگرام کے لیے) منصوبہ بنایا ہے۔ اس کے علاوہ راؤت نے مہاراشٹر اسمبلی کے اسپیکر راہل نارویکر کے اس فیصلے پر بھی سوال اٹھایا جس میں انہوں نے ایکناتھ شندے کی حکومت کو برقرار رکھنے کا فیصلہ سنایا۔

راؤت نے شنکراچاریہ کی طرف سے مندر کی تقریب کی مخالفت کا بھی ذکر کیا۔ انہوں نے کہا کہ پی ایم مودی ملک کے سب سے بڑے شنکراچاریہ بن گئے ہیں! رام مندر ابھی تک ایک نامکمل منصوبہ ہے لیکن اس کی پران پرتشٹھا ہونے جا رہی ہے۔ چاروں شنکراچاریوں نے اس کی مخالفت کی ہے لیکن یہ سب کیا جا رہا ہے۔

راوت نے وزیر اعظم نریندر مودی کے ناسک کے کالارام مندر میں پوجا کرنے کے منصوبے پر بھی سوال اٹھایا (یہ ان جگہوں میں سے ایک ہے جہاں شری رام نے جلاوطنی کے دوران اپنا وقت گزارا تھا)۔ الزام عائد کیا کہ مودی اور بی جے پی شیوسینا کی نقل کرتے ہیں۔ جب ادھو نے کہا کہ وہ ناسک کے کالارام مندر جائیں گے تو پی ایم مودی نے بھی وہاں جانے کا منصوبہ بنایا۔ اب ہم کہتے ہیں کہ ہم منی پور میں رام مندر جائیں گے، اب پی ایم بتائیں کہ کیا وہ بھی منی پور جائیں گے؟

شیوسینا لیڈر نے نارویکر کے فیصلے پر بھی سوال اٹھائے اور کہا کہ ان کی پارٹی کے آئینی ترمیم سے متعلق تمام ثبوت موجود ہیں۔ الیکشن کمیشن سے لے کر جہاں بھی دینا تھا، ہر جگہ دیے گئے، لیکن اگر کوئی ’دھرت راشٹر‘ (مہابھارت کا کردار) کی طرح اندھا اور بہرہ بن کر بیٹھا رہے تو ہم کیا کر سکتے ہیں۔ جب ایکناتھ شندے اور ان کے بیٹے الیکشن لڑنے گئے تھے تو ان کے فارم پر ادھو ٹھاکرے نے ہی بطور صدر دستخط کئے تھے، عوام ان لوگوں کو کبھی معاف نہیں کرے گی۔