[]
نئی دہلی: دہلی اور قومی راجدھانی خطہ جمعہ کی صبح گھنی دھند کی زد میں رہا، جس سے پروازیں اور ٹرین آپریشن متاثر ہوئے اور ہوا کا معیار 359 کے اے کیو آئی کے ساتھ ‘انتہائی خراب’ زمرے میں رہا ناردرن ریلوے کے مطابق دھند کی وجہ سے 11 ٹرینیں تاخیر سے دہلی پہنچیں۔
تاخیر سے چلنے والی ٹرینوں میں ممبئی سی ایس ٹی ایم امرتسر ایکسپریس، فرخا ایکسپریس، برہم پترا میل، ایم سی ٹی ایم ادھم پور- دہلی سرائے روہیلا اور جموں میل شامل ہیں۔ راجدھانی ایکسپریس دہلی ہوڑہ روٹ پر 10 سے 12 گھنٹے کی تاخیر سے چل رہی ہے۔
دریں اثنا، اندرا گاندھی بین الاقوامی ہوائی اڈے پر دھند کے حالات نمایاں طور پر بہتر ہوئے کیونکہ کم از کم ویژول 150 میٹر ریکارڈ کی گئی جبکہ رن وے ویژول رینج (آر وی آر) 400 میٹر سے 800 میٹر کے درمیان رہی۔
محکمہ موسمیات (آئی ایم ڈی) کے مطابق جمعہ کو زیادہ سے زیادہ درجہ حرارت 21 ڈگری سینٹی گریڈ اور کم سے کم درجہ حرارت 10.4 ڈگری سیلسیس ریکارڈ کیا گیا جو معمول سے چار ڈگری زیادہ ہے۔
موسمیاتی ایجنسی نے پیش گوئی کی ہے کہ شمالی ہند کی ریاستوں میں اگلے دو دنوں تک گھنے سے انتہائی گھنی دھند کی کیفیت برقرار رہے گی اور اس کے بعد بتدریج بہتری آئے گی۔
آئی ایم ڈی کے مطابق اگلے دو دنوں تک پنجاب، ہریانہ، چنڈی گڑھ، دہلی اور مغربی اتر پردیش کے کچھ حصوں اور مشرقی اتر پردیش کے مختلف حصوں میں سردی کی لہر کا امکان ہے۔
آئی ایم ڈی کے سینئر سائنسدان ڈاکٹر آر کے۔ جینامنی نے کہا کہ پنجاب، ہریانہ، چنڈی گڑھ، جموں و کشمیر اور اتر پردیش میں گھنی دھند کی وجہ سے صورتحال مزید خراب ہوئی ہے۔ انہوں نے کہا کہ آئی ایم ڈی نے پہلے ہی پنجاب، ہریانہ اور اتر پردیش کے لیے گھنے دھند کے حالات کے لیے ‘ریڈ الرٹ’ وارننگ جاری کی ہے، تاہم دہلی میں دھند کے حالات میں بہتری آئی ہے۔
ہمیں فالو کریں
