عرب نوجوانوں کا ایک حصہ ایرانی نعروں سے دھوکہ کھا گیا ہے:محمد الحورانی

تحریک فتح کی انقلابی کونسل کے رکن محمد الحورانی نے کہا ہے کہ ایران اپنا اثر و رسوخ ظاہر کرنے کے لیے فلسطینیوں کے خون کو ایک کارڈ کے طور پر استعمال کر رہا ہے۔ انہوں نے بدھ کے روز العربیہ کو دیے گئے بیانات میں مزید کہا کہ عرب نوجوانوں کا ایک حصہ ایرانی نعروں سے دھوکہ کھا گیا ہے۔ انہیں اس خطرے کا احساس کرنا چاہیے۔

محمد الحورانی نے مزید کہا کہ حماس ایک فلسطینی تنظیم ہے۔ ہمیں امید ہے کہ وہ استحصالی علاقائی اتحاد کو ترک کر دے گی۔الحورانی کا یہ بیان ایرانی پاسداران انقلاب کے ترجمان رمضان شریف کے اعلان کے بعد سامنے آیا ہے کہ حماس کی طرف سے “طوفان الاقصیٰ” آپریشن تین سال قبل پاسداران انقلاب میں قدس فورس کے کمانڈر قاسم سلیمانی کے قتل کے ردعمل میں کیا گیا ہے۔ حماس نے ایران کے اس دعوے کی تردید کردی ہے۔

الحورانی نے بدھ کو پریس کانفرنس میں مزید کہا کہ 7 اکتوبر کے واقعات قاسم سلیمانی کے قتل کی انتقامی کارروائیوں میں سے ایک تھے۔ پاسداران انقلاب کے ترجمان نے تل ابیب کو جنرل رضی موسوی کے قتل کے جواب میں اسی طرح کے حملے سے بھی خبردار کیا۔

دوسری طرف حماس نے بدھ کو ایک بیان میں وضاحت کی ہے کہ اس نے متعدد مرتبہ آپریشن ’’ طوفان الاقصیٰ‘‘ کے محرکات اور وجوہ کو بیان کیا ہے۔ یہ آپریشن مسجد اقصیٰ کو لاحق خطرات کے تناظر میں کیا گیا ہے۔حماس کے بہ قول تمام فلسطینی مزاحمتی کارروائیاں اسرائیل کی موجودگی اور ہمارے لوگوں کے خلاف اس کی مسلسل جارحیت کے جواب میں کی جاتی ہیں۔