جودھپور کے پاوٹا ضلع اسپتال میں سیزیرین زچگی کے بعد 8 خواتین کی طبیعت خراب ہو گئی، جن میں دو خواتین کو متھرا داس ماتھر اسپتال کے انتہائی نگہداشت یونٹ میں داخل کیا گیا۔ باقی 6 خواتین زیر علاج ہیں۔ اسپتال انتظامیہ نے واقعے کی جانچ شروع کرتے ہوئے آپریشن تھیٹر کو عارضی طور پر بند کر دیا ہے۔ نمونوں کو جانچ کے لیے تجربہ گاہوں میں بھیجا گیا ہے اور رپورٹ آنے کا انتظار کیا جا رہا ہے۔
تازہ واقعے کے بعد کانگریس نے راجستھان میں صحت خدمات کی صورت حال کو لے کر حکومت پر شدید حملہ کیا ہے۔ سابق وزیر اعلیٰ اشوک گہلوت نے کہا کہ کوٹا اور بیکانیر کے بعد جودھپور میں زچہ خواتین کی حالت بگڑنا انتہائی تشویشناک ہے۔ ان کے مطابق خون میں انفیکشن اور گردوں کے متاثر ہونے جیسے معاملات طبی نظام میں سنگین خامیوں اور لاپروائی کی نشاندہی کرتے ہیں۔ انہوں نے الزام لگایا کہ انتظامیہ اصل صورت حال کو عوام سے پوشیدہ رکھنے میں مصروف رہی۔
