دیوالی پر اروند کیجریوال کی سنجے سنگھ  اور سسودیا کے اہل خانہ سے ملاقات

دیوالی کے موقع پر، دہلی کے وزیر اعلیٰ اور عام آدمی پارٹی کے کنوینر اروند کیجریوال، راجیہ سبھا کے رکن  سنجے سنگھ کے اتوار (12 نومبر) کو ان کی رہائش گاہ پہنچے۔  رکن پارلیمنٹ  سنجے سنگھ ایکسائز پالیسی سے متعلق ایک کیس میں جیل میں ہیں۔ انہیں انفورسمنٹ ڈائریکٹوریٹ نے 4 اکتوبر کو گرفتار کیا تھا۔ عآپ  کے رکن پارلیمنٹ سنجے سنگھ فی الحال تہاڑ جیل میں بند ہیں، 10 نومبر کو راجدھانی کی راؤز ایونیو کورٹ میں اس کیس کی سماعت کے بعد انہیں 24 نومبر تک عدالتی حراست میں بھیج دیا گیا ہے۔

اس سے قبل اتوار (12 نومبر) کو وزیر اعلی اروند کیجریوال دہلی حکومت کے وزیر آتشی کے گھر ان سے ملنے پہنچے۔ میڈیا میں شائع خبروں کے مطابق،  وزیر اعلی  اروند کیجریوال یہاں عام آدمی پارٹی کے  لیڈر اور سابق نائب وزیر اعلیٰ منیش سسودیا کے اہل خانہ سے ملنے آئے تھے۔ عدالت سے اجازت ملنے کے بعد منیش سسودیا ہفتہ (11 نومبر) کو اپنی بیمار بیوی کے پاس پہنچے۔ اس کی تصویر شیئر کرتے ہوئے سی ایم اروند کیجریوال نے اپنے سوشل میڈیا پیغام میں لکھا تھا کہ یہ تصویر بہت تکلیف دہ ہے۔ کیا ملک کے غریب بچوں کو امید دلانے والے شخص کے لیے ایسی ناانصافی درست ہے؟

دہلی حکومت کی وزیر آتشی نے منیش سسودیا اور ان کی اہلیہ کی ملاقات کی تصویر شیئر کرتے ہوئے سوشل میڈیا X (اس سے قبل ٹوئٹر) پر ایک جذباتی پوسٹ بھی لکھی تھی۔ درحقیقت ہفتہ کو راؤز ایونیو کورٹ سے اجازت ملنے کے بعد سابق ڈپٹی سی ایم مسیش سسودیا اپنی بیمار بیوی سے ملنے آئے تھے۔ خاص بات یہ ہے کہ منیش سسودیا نے اپنی اہلیہ سے اسی گھر میں ملاقات کی جو انہیں وزیر بننے کے بعد الاٹ کیا گیا تھا۔ یہ گھر فی الحال وزیر آتشی کو الاٹ کیا گیا ہے۔

منیش سسودیا اور ان کی اہلیہ کی تصویر شیئر کرتے ہوئے آتشی نے لکھا، “یہ تصویر روح کو ہلا کر رکھ دیتی ہے۔ منیش سسودیا وہ شخص ہیں جنہوں نے لاکھوں بچوں کی آنکھوں میں خواب جگایا۔”