درگاہ آجمیر شریف کے احاطے میں واقع مشہور ’’بڑی دیگ‘‘ میں ایک نوجوان کے مبینہ طور پر چھلانگ لگانے کا واقعہ پیش آیا، جس کے بعد درگاہ عملے اور انتظامیہ میں سنسنی پھیل گئی۔ یہ واقعہ اتوار کے روز پیش آیا۔
عینی شاہدین کے مطابق نوجوان اچانک دوڑتے ہوئے بڑی دیگ کی طرف بڑھا۔ وہاں موجود خدام اور عملے نے اسے روکنے کی کوشش کی، مگر وہ قابو میں آنے سے پہلے ہی دیگ میں کود گیا۔
درگاہ کمپلیکس میں نصب سی سی ٹی وی کیمروں میں یہ پورا واقعہ ریکارڈ ہوگیا۔ خبر رساں ایجنسی اے این آئی کے مطابق واقعے کے وقت دیگ میں نقد نذرانے اور زیورات بھی موجود تھے۔
رپورٹس کے مطابق نوجوان اچانک ہجوم سے نکل کر بڑی دیگ کی جانب دوڑا، جس میں غریبوں کے لیے بڑی مقدار میں کھانا تیار کیا جاتا ہے اور جہاں عقیدت مند نقد رقم اور زیورات کے نذرانے بھی ڈالتے ہیں۔ درگاہ کے خدام اور عملے نے اسے روکنے کی کوشش کی مگر وہ دیگ میں کودنے میں کامیاب ہوگیا، جس کے بعد وہاں موجود زائرین میں خوف و ہراس پھیل گیا۔
واقعے کے فوراً بعد درگاہ کمیٹی کے ملازمین دیگ کے اندر اترے اور کافی کوشش کے بعد نوجوان کو باہر نکالا۔ اس دوران بعض عملے کے افراد کی جانب سے نوجوان کو مارنے پیٹنے کی اطلاعات بھی سامنے آئی ہیں۔
ابتدائی معلومات کے مطابق نوجوان کے ذہنی طور پر غیر مستحکم ہونے کا شبہ ظاہر کیا جا رہا ہے، تاہم اس کی شناخت اور اس اقدام کے اصل محرکات تاحال واضح نہیں ہوسکے۔ حکام نے واقعے کی تحقیقات شروع کر دی ہیں۔
