[]
سارن کے ضلع مجسٹریٹ امر سمیر نے کہا کہ یہ کسی طرح کی بھگدڑ نہیں ہے، دراصل ایک ساتھ 100 سے زیادہ لوگوں نے احاطہ میں گھسنے کی کوشش کی جس سے کچھ لوگ گر گئے اور دوسروں نے انھیں کچل دیا۔
بہار کے چھپرہ شہر میں جمعہ کی صبح ایک مذہبی تقریب کا انعقاد ہوا جس میں بھگدڑ مچ گئی۔ اس بھگدڑ میں 2 خاتون عقیدتمندوں کی موت ہو گئی جبکہ کئی دیگر افراد زخمی ہو گئے۔ حالانکہ ضلع انتظامیہ نے بھگدڑ کی بات سے انکار کرتے ہوئے بدانتظامی کو حادثہ کی وجہ بتایا ہے۔
موصولہ اطلاع کے مطابق چھپرہ کے مستی چک علاقے میں ایک جگہ ’گایتری یگیہ‘ کے لیے 100 سے زیادہ بھکت جمع ہوئے تھے۔ جیسے ہی یگیہ کے انعقاد والی جگہ کا دروازہ کھلا تو باہر جمع عقیدتمند ایک ساتھ لاپروائی کے ساتھ اندر گھسنے لگے جس سے وہاں بھگدڑ مچ گئی۔ اس دوران دو خواتین گر گئیں اور بھیڑ کے نیچے دب گئیں۔
حادثہ کی خبر ملنے پر ضلع انتظامیہ فوراً حرکت میں آئی اور آناً فاناً کثیر پولیس فورس کے ساتھ کئی افسران جائے حادثہ پر پہنچے اور متاثرین کو نکالنے کے لیے بچاؤ مہم شروع کی۔ اس دوران 2 بیہوش خواتین کو وہاں سے نکال کر اسپتال لے جایا گیا جہاں ڈاکٹروں نے انھیں مردہ قرار دے دیا۔
سارن کے ضلع مجسٹریٹ امیر سمیر نے کہا کہ یہ کسی طرح کی بھگدڑ نہیں تھی، بلکہ ایک ساتھ 100 سے زیادہ لوگوں نے احاطہ میں گھسنے کی کوشش کی۔ اس دوران دھکا مکی میں ان میں سے کچھ لوگ گر گئے اور دوسروں نے انھیں کچل دیا۔ زخمی خواتین میں سے دو کو اسپتال لے جایا گیا جہاں انھوں نے دَم توڑ دیا۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
;
