مدھیہ پردیش کے دھار ضلع میں واقع کمال مولا مسجد-بھوج شالہ احاطہ میں آج بسنت پنچمی کے موقع پر طلوعِ آفتاب کے بعد ہندو فریق کی جانب سے پوجا کا سلسلہ شروع ہو گیا ہے، جبکہ دوپہر میں نماز جمعہ کی ادائیگی کے لیے انتظامات مکمل کیے جا رہے ہیں۔ یہ تمام سرگرمیاں سپریم کورٹ کے تازہ حکم کے مطابق سخت سکیورٹی کے درمیان انجام دی جا رہی ہیں۔
بسنت پنچمی اور جمعہ ایک ہی دن پڑنے کے باعث کسی بھی ناخوشگوار صورت حال سے بچنے کے لیے ضلعی انتظامیہ نے غیر معمولی حفاظتی اقدامات کیے ہیں۔ شہر اور بھوج شالہ کے اطراف تقریباً 8 ہزار پولیس اور نیم فوجی اہلکار تعینات کیے گئے ہیں۔ مقامی پولیس کے ساتھ سی آر پی ایف اور ریپڈ ایکشن فورس کے جوان بھی موجود ہیں، جبکہ پورے علاقے کی نگرانی ڈرون کے ذریعے کی جا رہی ہے۔
