[]
حیدرآباد: مرکزی وزیرسیاحت و تلنگانہ بی جے پی کے صدر جی کشن ریڈی نے کہا ہے کہ انتخابی حکمت عملی کے تحت امیدواروں کا اعلان تاخیر سے کیا جائے گا تاہم انہوں نے نشاندہی کی کہ امیدواروں کا انتخاب 50 فیصد تک مکمل ہو چکا ہے۔
انہوں نے سکندرآباد ریلوے اسٹیشن پر ساؤتھ سنٹرل ریلوے کی جانب سے تلنگانہ میں چار ٹرین خدمات کی توسیع کو جھنڈی دکھا ئی۔
اس موقع پر کشن ریڈی نے خطاب کرتے ہوئے کہا کہ وزیر اعظم پہلے ہی دو بار تلنگانہ کا دورہ کر چکے ہیں۔ مرکزی وزراء اور بی جے پی لیڈر جلد ہی انتخابی مہم کے لیے تلنگانہ کا دورہ کریں گے۔
انہوں نے کہاکہ عوام چاہتے ہیں کہ بی جے پی اقتدار میں آئے۔ مرکز ی حکومت نے ریاست میں ریلوے کے پراجکٹس پر ہزاروں کروڑ روپے خرچ کئے ہیں۔ حیدرآباد میں ایک نیا ریلوے ٹرمینل قائم کیاجانے والا ہے۔
چرلہ پلی ریلوے ٹرمنل کا آغاز جنوری میں ہوگا۔ایم ایم ٹی ایس کے دوسرے مرحلہ کے کام بھی جلد مکمل کئے جائیں گے۔ ریاستی حکومت تعاون کرتی ہے تو ایم ایم ٹی ایس کی توسیع یادادری تک کی جائے گی۔
ریلوے بورڈ نے ایم ایم ٹی ایس کے دوسرے مرحلہ کے لیے فنڈز کی منظوری دی ہے۔ اگر ریاستی حکومت تعاون کرے تو ہم تیزی سے کام مکمل کریں گے۔
