یہ فیصلہ اس وقت کیا گیا جب جمعہ کی صبح تہران سمیت مختلف شہروں میں اسرائیلی حملوں کے نتیجے میں ایران کے چیف آف اسٹاف محمد باقری، پاسداران انقلاب کے کمانڈر حسین سلامی اور خاتم الانبیاء سینٹرل ہیڈکوارٹرز کے سربراہ غلام علی راشد جان بحق ہو گئے۔
سرکاری خبر رساں ایجنسی ’ارنا‘ کے مطابق، حملوں میں 6 ایرانی جوہری سائنس دان بھی مارے گئے، جن میں محمد مہدی طہرانچی اور فریدون عباسی شامل ہیں۔ ساتھ ہی متعدد شہریوں کے بھی جان بحق ہونے کی اطلاعات ہیں۔ آیت اللہ خامنہ ای نے ان حملوں کی شدید مذمت کرتے ہوئے کہا کہ یہ ایران کے خلاف سنگین جرم ہے اور اسرائیل کو اس کا سخت جواب دیا جائے گا۔
