بیجنگ: چین آج یعنی 24 اپریل کو مقامی وقت کے مطابق شام 5 بج کر 17 منٹ پر شنجو-20 (Shenzhou-20) نامی جدید ترین انسانی خلائی مشن روانہ کرے گا۔ اس مشن کے تحت تین خلا نورد، یعنی چن تُنگ، چن چونگرُوئی اور وانگ چیے، چین کے اسپیس اسٹیشن پر 6 ماہ کا قیام کریں گے۔ مشن کے کمانڈر کا کردار تجربہ کار خلا نورد چن تُنگ کو سونپا گیا ہے۔
چن تُنگ اس سے قبل شنجو-11 اور شنجو-14 مشنوں کا حصہ رہ چکے ہیں اور وہ خلا میں اپنے کامیاب تجربات کی بدولت اس بار بھی قیادت کی ذمہ داری نبھائیں گے۔ ان کے ہمراہ جانے والے دونوں ساتھی — چن چونگرُوئی اور وانگ چیے — پہلی بار خلائی سفر پر جا رہے ہیں، جس کے لیے ان کی تربیت مکمل کر لی گئی ہے۔
