سری نگر: پی ڈی پی صدر اور سابق وزیر اعلیٰ محبوبہ مفتی نے لوگوں کو ہولی کے پر مسرت تہوار پر مبارکباد پیش کرتے ہوئے کہا ہے کہ یہ تہوار میرے لئے ہمیشہ ہندوستان کی گنگا جمنا تہذیب کی علامت رہا ہے۔انہوں نے کہا:’تاہم اب کچھ متعصب لوگوں نے اس جشن کو اقلیتوں کے لیے خوف کا باعث بنا دیا ہے’۔
واضح رہے کہ ہولی ہندو مذہب کا ایک بہت بڑا تہوار ہے جس کو رنگوں اور بہار کے تہوار کے طور پر بھی یاد کیا جاتا ہے۔ یہ تہوار برائی پر اچھائی کی فتح کی علامت ہے۔ موصوف سابق و زیر اعلیٰ نے جمعہ کے روز اس مقدس تہوار کے موقع پر لوگوں کو مبارکباد پیش کی۔
انہوں نے ‘ایکس’ پر اپنے ایک پوسٹ میں کہا: ‘ہولی کا تہوار میرے لئے ہمیشہ ہندوستان کی گنگا جمنا تہذیب کی علامت رہا ہے’۔ان کا کہنا تھا: ‘ مجھے یاد ہے کہ میں یہ تہوار اپنے ہندو دوستوں کے ساتھ بے پناہ خوشی اور جوش و خروش سے منانے کے لئے بے صبری سے انتظار کرتی تھی’۔
محبوبہ مفتی نے کہا: ‘ تاہم اب کچھ متعصب لوگوں نے اقتدار میں رہنے والوں کی منظوری سے اس جشن کو اقلیتوں کے لیے خوف کا باعث بنا دیا ہے’۔انہوں نے اپنے پوسٹ میں مزید کہنا: ‘یہ بھارت کے جاگنے کا وقت ہے، سب کو ہولی کی مبارکباد’۔
ہمیں فالو کریں
