’مہاگٹھ بندھن‘ میں نتیش کمار کی واپسی پر تیجسوی کا دو ٹوک جواب – ’بہار میں اب سیدھا الیکشن ہوگا‘

بہار میں رواں سال ہونے والے اسمبلی انتخاب سے قبل ہی سیاسی پارہ کافی ہائی ہو چکا ہے۔ راشٹریہ جنتا دل (آر جے ڈی) دفتر کے سامنے احتجاج کر رہے تیجسوی یادو سے اتوار (9 مارچ) کو نامہ نگاروں نے جب سوال کیا کہ کیا آر جے ڈی کی جانب سے بہار کے وزیر اعلیٰ نتیش کمار کو ’مہاگٹھ بندھن‘ میں آنے کا آفر دیا گیا ہے؟ کیا مہاگٹھ بندھن میں آئیں گے تو ان کا استقبال کریں گے؟ اس پر آر جے ڈی لیڈر تیجسوی یادو ناراض ہو گئے اور کہا کہ ’’بکواس ہے یہ، اب بہار میں سیدھا اسمبلی انتخاب ہوگا۔‘‘

علاوہ ازیں تیجسوی یادو نے کہا کہ نتیش کمار کو ساتھ لانے کا سوال ہی پیدا نہیں ہوتا۔ نتیش اور بی جے پی دونوں ریزرویشن چور ہیں۔ ریزرویشن چوروں کو ہم ساتھ نہیں لے سکتے ہیں۔ ہماری پارٹی کی جانب سے نتیش کمار کو نہ تو پہلے آفر دیا گیا تھا اور نہ ابھی دیا گیا ہے۔ ان کو آفر نہیں دیں گے۔ بیان دینے کے لے ہم اور لالو یادو مجاز ہیں۔ اس کے علاوہ کسی کو بھی اس پر بولنے کا کوئی حق نہیں ہے۔ آخر اس طرح کا سوال کہاں سے آ جاتا ہے؟ اس طرح کی فالتو کی باتیں نہیں ہونی چاہیے۔

تیجسوی یادو کے اس بیان سے واضح ہو گیا ہے کہ نتیش کے لیے مہاگٹھ بندھن کے دروازے بند ہیں۔ ویسے آئے دن آر جے ڈی کے لیڈران ہی نتیش کو ڈر دکھاتے رہتے ہیں کہ ’’بی جے پی، جے ڈی یو کے اراکین اسمبلی اور اراکین پارلیمنٹ کو توڑ دے گی، نتیش کو وزیر اعلیٰ کی کرسی سے ہٹا دے گی، اپنا وزیر اعلیٰ بنا لے گی، جے ڈی یو کو ختم کر دے گی۔‘‘ حالانکہ آر جے ڈی لیڈران کئی بار نتیش کمار کو بالواسطہ یا بلاواسطہ طور پر مہاگٹھ بندھن میں آنے کا آفر بھی دے دیتے ہیں، لیکن تیجسوی یادو نے صاف کر دیا ہے کہ نتیش کے لیے کوئی آفر نہیں ہے۔ ویسے نتیش کمار کئی بار بول چکے ہیں کہ 2 بار ادھر سے ادھر ہو گئے تھے، اب ہمیشہ این ڈی اے میں ہی رہیں گے۔