پریاگ راج مہا کمبھ کے دوران چوری کیے گئے 90 مہنگے اینڈرائیڈ فون وارانسی کینٹ ریلوے اسٹیشن پر پکڑے گئے ایک چور سے برآمد ہوئے۔
فائل تصویر آئی اے این ایس
پریاگ راج میں ختم ہوئے مہا کمبھ کے دوران چوروں نے بڑے پیمانے پر عقیدتمندوں کی آئی بھیڑ کا فائدہ اٹھایا۔ یہ انکشاف اس وقت ہوا جب جی آر پی اور آر پی ایف کی مشترکہ ٹیم نے وارانسی کینٹ ریلوے اسٹیشن پر ایک چالاک چور کو 90 مہنگے اینڈرائیڈ فونز کے ساتھ پکڑا۔ ان چوری شدہ فونز کی قیمت تقریباً 60 لاکھ روپے بتائی گئی ہے۔
نیوز پورٹل ’آج تک‘ پر شائع خبر کے مطابق وارانسی کینٹ جی آر پی اسٹیشن کے سربراہ ہیمنت کمار نے بتایا کہ بہار کے مہاراج گنج کے رہنے والے روی کمار عرف گولو کو ریلوے اسٹیشن پر چیکنگ کے دوران پکڑا گیا۔ مشکوک حالت میں پکڑے گئے نوجوان سے بیگ میں چھپائے گئے 90 مہنگے موبائل فون اور 1950 روپے نقدی برآمد کر لی گئی۔ پوچھ گچھ کے دوران اس نے اعتراف کیا کہ یہ فون پریاگ راج اور وارانسی سے چوری کیے گئے تھے۔
پولیس افسر کا کہنا تھا کہ برآمد کیے گئے موبائلز کو نگرانی پر رکھا جا رہا ہے تاکہ ان کے اصل مالکان کی شناخت ہو سکے۔ ملزم سے مزید پوچھ گچھ جاری ہے کہ آیا اس کے پیچھے کوئی بڑا گینگ ہے یا نہیں۔ پولیس کا ماننا ہے کہ مہا کمبھ کے دوران اس طرح کی چوری کی وارداتیں منظم انداز میں انجام دی گئی ہوں گی۔
پولیس اب اس بات کی جانچ کر رہی ہے کہ آیا چوری کا یہ سلسلہ مہا کمبھ میں شرکت کے لیے آئے ہوئے لوگوں کو نشانہ بنانے کی کسی بڑی سازش کا حصہ تھا۔ معاملہ مزید سنگین ہو گیا ہے کیونکہ برآمد ہونے والے فون کی قیمت 60 لاکھ روپے ہے۔ انتظامیہ نے میلے میں سکیورٹی کے انتظامات مزید سخت کرنے کا عندیہ دیا ہے۔
