’کسی کو ہولی کے رنگوں سے مسئلہ ہے تو گھر سے باہر نہ نکلے‘، سی او سنبھل کے بیان پر سماجوادی پارٹی شدید برہم

یہ تنازع اس وقت کھڑا ہوا جب سنبھل میں پیس کمیٹی کی ایک میٹنگ کے دوران سی او انوج چودھری نے ہولی اور عید کے حوالے سے بیان دیا۔ انہوں نے کہا کہ اگر کسی کو ہولی کے رنگوں سے مسئلہ ہے تو وہ اس دن اپنے گھر سے نہ نکلے۔ انہوں نے مزید کہا کہ اگر کوئی باہر آتا ہے تو اسے بڑے دل کا مظاہرہ کرنا چاہیے۔ سی او کے اس بیان کے بعد سیاسی حلقوں میں زبردست ردعمل دیکھنے کو مل رہا ہے۔

سی او انوج چودھری نے اپنے بیان میں مزید کہا تھا کہ “جس طرح پورے سال مسلم برادری عید کا انتظار کرتی ہے، اسی طرح ہندو برادری ہولی کا انتظار کرتی ہے۔ ہولی خوشی سے منائی جاتی ہے، رنگ ڈال کر، مٹھائی کھلا کر، اور ‘بُرا نہ مانو ہولی ہے’ کہہ کر جشن منایا جاتا ہے۔” انہوں نے عوام سے اپیل کی کہ وہ ایک دوسرے کا احترام کریں اور غیر ضروری طور پر کسی پر رنگ نہ ڈالیں۔