کوشامبی سے ببر خالصہ کا مشتبہ دہشت گرد گرفتار، آئی ایس آئی سے روابط کا انکشاف

لکھنؤ: اتر پردیش کے کوشامبی ضلع میں یوپی اسپیشل ٹاسک فورس (ایس ٹی ایف) اور پنجاب پولیس کے مشترکہ آپریشن میں ببر خالصہ انٹرنیشنل (بی کے آئی) اور آئی ایس آئی سے جڑے ایک مشتبہ دہشت گرد کو گرفتار کیا گیا ہے۔ گرفتار کیے گئے ملزم کی شناخت لائزر مسیح ولد کلویندر کے طور پر ہوئی ہے، جو پنجاب کے ضلع امرتسر کے گاؤں کورلیان، پوسٹ ماکووال، تھانہ رامداس کا رہائشی ہے۔

حکام کے مطابق، مشتبہ دہشت گرد کو کوشامبی ضلع کے کوکھراج تھانہ علاقے سے جمعرات کی صبح تقریباً 3:20 بجے حراست میں لیا گیا۔ اس دوران اس کے قبضے سے تین ہینڈ گرینیڈ، دو ڈیٹونیٹر، ایک غیر ملکی پستول سمیت دو ہتھیار اور غیر ملکی ساختہ دھماکہ خیز مواد برآمد ہوا۔ اس کے علاوہ، ملزم کے پاس غازی آباد کے پتے پر بنا آدھار کارڈ اور بغیر سم کارڈ والا ایک موبائل فون بھی ملا ہے۔

ایڈیشنل ڈائریکٹر جنرل (اے ڈی جی) یوپی اسپیشل ٹاسک فورس، امیتابھ یش نے بتایا کہ گرفتار شدہ ملزم مبینہ طور پر ببر خالصہ انٹرنیشنل کے جرمنی میں سرگرم ماڈیول کے سربراہ سورن سنگھ عرف جیون فوجی کے لیے کام کرتا تھا۔ مزید برآں، تحقیقات میں اس کے پاکستان کی خفیہ ایجنسی آئی ایس آئی کے ساتھ براہ راست تعلقات ہونے کا بھی انکشاف ہوا ہے۔

ذرائع کے مطابق، لائزر مسیح 24 ستمبر 2024 کو پنجاب پولیس کی حراست سے فرار ہو گیا تھا، جس کے بعد سے سیکورٹی ایجنسیاں اس کی تلاش میں تھیں۔ اس کی گرفتاری کو یوپی ایس ٹی ایف اور پنجاب پولیس کی بڑی کامیابی قرار دیا جا رہا ہے۔ فی الحال سکیورٹی ایجنسیاں ملزم سے مزید تفتیش کر رہی ہیں، اور امکان ہے کہ اس سے کئی اہم معلومات سامنے آئیں گی۔