حیدرآباد: شادی کی تقریب میں شرکت کے بعد حیدرآباد سے آندھراپردیش کے نیلور واپس ہونے کے دوران ایک پرائیویٹ ٹراویلس کی بس ٹریکٹر سے ٹکرا گئی، جس کے نتیجہ میں ایک خاتون ہلاک ہو گئی اور 15 افراد شدید زخمی ہو گئے۔
یہ حادثہ اتوار کی صبح تلنگانہ کے نلگنڈہ ضلع کے مریال گوڑہ کے چنتا پلی بائی پاس پر پیش آیا۔ ذرائع کے مطابق، نیلور سے تعلق رکھنے والے چند افراد حیدرآباد میں ایک شادی میں شرکت کے بعد بس کے ذریعہ واپس جا رہے تھے۔
راستہ میں، مریال گوڑہ منڈل کے قریب ایک ٹریکٹر کو پیچھے سے تیز رفتار بس نے ٹکر مار دی۔ اس حادثہ میں ٹریکٹر پر سوار این سنیتا موقع پر ہی ہلاک ہو گئیں، جبکہ ٹریکٹر ڈرائیور این سدیا شدید زخمی ہو گیا۔
بس میں سوار نیلور کے راج شیکھر، ناگا چریتا، شیلجہ رادھا، اکھیلا، شیوا رام کرشنا، سریندر راؤ سمیت بس ڈرائیور اور کلینر بھی زخمی ہوگئے۔ زخمیوں میں سے ٹریکٹر ڈرائیور سدیا اور دو دیگر افراد کی حالت تشویشناک بتائی جا رہی ہے۔
تمام زخمیوں کو فوری طور پر مریال گوڈہ کے مختلف پرائیویٹ اسپتال میں داخل کرایا گیا، جہاں ان کا علاج جاری ہے۔
ہمیں فالو کریں
