مہر خبررساں ایجنسی کے مطابق، ایرانی پارلیمنٹ کے اسپیکر نے لبنان اور مقاومت اسلامی کے ساتھ ایران کی یکجہتی کا اظہار کرتے ہوئے کہا کہ لبنان جلد استحکام اور ترقی کی راہ پر گامزن ہوگا۔
بیروت میں صحافیوں سے گفتگو کرتے ہوئے انہوں نے کہا کہ آج مجھے یہ اعزاز حاصل ہوا کہ میں ایک اعلی سطحی وفد کے ساتھ بیروت پہنچوں، جس میں رہبر معظم کے دفتر، حکومت، عدلیہ اور پارلیمنٹ کے نمائندے، ثقافتی شخصیات نیز شہداء کے اہل خانہ شامل ہیں۔ ہم یہاں دو عظیم شہداء، شہید نصر اللہ اور شہید سید ہاشم صفی الدین کے جنازے میں شرکت کے لیے آئے ہیں۔
قالیباف نے مزید کہا کہ صیہونی حکومت یہ دعوی کررہی تھی کہ وہ جنوبی لبنان پر حملہ کرکے پورے ملک پر قبضہ کرے گی اور حماس و حزب اللہ کو تباہ کر دے گی لیکن آج صہیونی حکومت کو شرمناک شکست ہوئی ہے اور غزہ کے عوام دوبارہ اپنے گھروں کو لوٹ رہے ہیں۔ دشمن جنوبی لبنان کی سرزمین سے پسپا ہو چکا ہے۔
ایران اور لبنان کے تعلقات پر بات کرتے ہوئے قالیباف نے واضح کیا کہ لبنان اور ایران کے درمیان صدیوں پر محیط گہرے تاریخی روابط ہیں۔ ہم ان شاء اللہ ان تعلقات کو مزید مضبوط بنانے کے لیے مشترکہ تعاون کو آگے بڑھائیں گے۔
قالیباف نے لبنانی عوام کے لیے نیک خواہشات کا اظہار کرتے ہوئے کہا کہ یقینا اسلامی جمہوریہ ایران ہر اس اتحاد و یکجہتی کی حمایت کرے گا جو لبنان کی حکومت، پارلیمنٹ، مقاومت اور عوام کے درمیان قائم ہوگا۔
