[]
حیدرآباد: وائی ایس آرتلنگانہ پارٹی کو آج کانگریس میں ضم کردیاگیا۔پارٹی کی بانی و صدروائی ایس شرمیلا جو گذشتہ روزقومی دارالحکومت نئی دہلی پہنچی تھیں نے آج اپنے شوہر کے ساتھ کانگریس کے دفتر پہنچ کر کانگریس میں شمولیت اختیار کرلی۔
انہوں نے اپنی پارٹی کوکانگریس میں ضم کردیا۔کھرگے اورراہل گاندھی نے انہیں پارٹی کا کھنڈواپہنایا۔اس طرح شرمیلارسمی طورپر کانگریس میں شامل ہوگئیں۔
کانگریس میں شرمیلا کی شمولیت کے موقع پر ان کے حامیوں نے ان کی تائید میں نعرے بازی کی۔اس موقع پر خطاب کرتے ہوئے شرمیلا نے اپنی پارٹی کے کانگریس میں انضمام پر مسرت کااظہارکیا۔انہوں نے نشاندہی کرتے ہوئے کہاکہ وائی ایس آرتلنگانہ پارٹی،آج سے انڈین نیشنل کانگریس کا حصہ بن گئی ہے۔
انہوں نے اپنے والد سابق وزیراعلی متحدہ آندھراپردیش راج شیکھرریڈی کو یاد کرتے ہوئے انہیں تلگوعوام کے ایک افسانوی رہنما قراردیاجنہوں نے اپنی پوری زندگی نہ صرف کانگریس کی خدمت کی بلکہ کانگریس کی خدمت کرتے ہوئے اپنی زندگی نچھاور کردی۔
انہوں نے زوردیتے ہوئے کہا کہ آج یہ خوشی کی بات ہے کہ ان کی بیٹی ان کے نقش قدم پر چل رہی ہے اورکانگریس پارٹی کا حصہ بن رہی ہیں۔انہوں نے کہا کہ کانگریس ہنوزملک کی سب سے بڑی سیکولر پارٹی ہے۔اس پارٹی نے ہمیشہ ہندوستان کی ثقافت کو برقراررکھا ہے اور ملک کی بنیاد تعمیر کی۔
کانگریس تمام طبقات کی خدمت کررہی ہے اور ملک کے تمام طبقات کومتحد کرنے کاکام کررہی ہے۔انہوں نے قبل ازیں پارٹی کے صدرملکارجن کھرگے کے علاوہ سونیا گاندھی، راہل گاندھی اور کانگریس کے دیگر کئی لیڈروں سے ملاقات کی۔سمجھاجاتا ہے کہ کانگریس کی اعلی قیادت شرمیلا کوآندھراپردیش کانگریس میں اہم ذمہ داری دے گی جہاں لوک سبھا انتخابات کے ساتھ ریاستی اسمبلی کے انتخابات ہونے والے ہیں۔
بعد ازاں میڈیا سے بات کرتے ہوئے انہوں نے کہاکہ راہل گاندھی کو وزیراعظم بنانے ان کے والد کاخواب تھااوروہ اس سمت کام کریں گی۔کانگریس پارٹی ان کو جوبھی ذمہ داری دے گی وہ اس کو پورا کریں گی۔کانگریس ہائی کمان نے احترام کے ساتھ انہیں پارٹی میں مدعو کیا ہے۔راج شیکھرریڈی کے خواب کو پورا کرنے کیلئے وہ کانگریس میں شامل ہوئی ہیں۔ملک کیلئے بی جے پی مناسب نہیں ہے، وہ چاہتی ہیں کہ راہل گاندھی وزیراعظم بنیں، اسی لئے وہ کانگریس میں شامل ہوئی ہیں۔
ہمیں فالو کریں
