کرناٹک میں کانگریس نے نافذ کی پانچویں گارنٹی، ’یوا ندھی‘ منصوبہ لانچ

کرناٹک میں کانگریس حکومت نے اپنے انتخابی وعدے پورے کرنے کا سلسلہ جاری رکھا ہوا ہے۔ تازہ ترین خبروں کے مطابق کانگریس نے اسمبلی انتخاب سے قبل جس پانچ گارنٹی کا اعلان کیا تھا، اس کی پانچویں گارنٹی کو بھی ریاست میں نافذ کر دیا ہے۔ اس گارنٹی کا نام ’یوا ندھی‘ ہے جس کے تحت ریاست کے بے روزگار گریجویٹس اور ڈپلوما ہولڈرس نوجوانوں کو معاشی مدد دی جائے گی۔

منگل کے روز کرناٹک کے وزیر اعلیٰ سدارمیا نے ’یوا ندھی‘ منصوبہ کو باضابطہ لانچ کیا۔ اس منصوبہ کے تحت نوجوانوں کو معاشی مدد کی فراہمی 12 جنوری 2024 سے شروع ہو جائے گی۔ قابل ذکر بات یہ ہے کہ 12 جنوری کو سوامی وویکانند کا یومِ پیدائش بھی ہے۔ اس موقع کو کانگریس یادگار بنانا چاہتی ہے، غالباً اسی لیے 12 جنوری کا انتخاب کیا گیا ہے۔

بہرحال، یوا ندھی منصوبہ کے تحت 23-2022 میں گریجویشن کی ڈگری لینے والے یا پھر ڈپلوما ہولڈرس بے روزگار نوجوانوں کو بالترتیب 3000 اور 1500 روپے دیے جائیں گے۔ منصوبہ کے تحت ڈگری/ڈپلوما کی پڑھائی پوری کرنے کے 180 دن بعد بھی بے روزگار رہنے والے نوجوانوں کو معاشی مدد دی جائے گی۔ اس منصوبہ کے تحت مدد پانے کے لیے نوجوانوں کو کم از کم چھ سال سے کرناٹک میں رہنے کا ثبوت دینا ہوگا۔