موسم کا حال: دہلی-یوپی سمیت متعدد ریاستوں میں دھند کا زور، کئی ریاستوں میں بارش کا الرٹ

نئی دہلی: شمالی ہندوستانی میں کڑاکے کی سردی جاری ہے۔ بعض مقامات پر شدید دھند پریشان کر رہی ہے اور بعض مقامات پر سردی کی لہر، بارش اور برف باری سے سردی بڑھ رہی ہے۔ تاہم میدانی علاقوں میں سردی سے کچھ راحت ملتی دکھائی دے رہی ہے۔ تازہ ترین ویسٹرن ڈسٹربنس کی وجہ سے دہلی اور اتر پردیش سمیت کئی ریاستوں میں کم سے کم درجہ حرارت میں اضافہ دیکھا جا رہا ہے۔

راجدھانی دہلی کا کم سے کم درجہ حرارت آج 3 پوائنٹس بڑھ کر 9 ڈگری سیلسیس ہو سکتا ہے اور زیادہ سے زیادہ درجہ حرارت 23 ڈگری سیلسیس ریکارڈ کیا جا سکتا ہے۔ تاہم یہاں شدید دھند نظر آئے گی۔ اس کے علاوہ آلودگی میں بھی اضافہ دیکھا جا سکتا ہے۔ دہلی والوں کو آئندہ چند دنوں میں سردی سے کچھ راحت ملے گی۔

اتر پردیش میں پچھلے کچھ دنوں سے بڑھتی ہوئی سردی اور سردی کی لہر سے راحت ملے گی۔ معلومات دیتے ہوئے سائنس دان اور اتر پردیش کے محکمہ موسمیات کے انچارج ڈاکٹر محمد دانش نے بتایا کہ افغانستان کے ارد گرد ویسٹرن ڈسٹربنس سرگرم ہے، جس کی وجہ سے مغربی اتر پردیش میں بادلوں کی نقل و حرکت جاری رہے گی۔ تاہم بارش کے امکانات کم ہیں اور اگلے ایک ہفتے تک دھوپ نکلنے کے امکانات ہیں جس سے عام لوگوں کو راحت ملے گی۔

اسکائی میٹ کے مطابق آئندہ 2 روز کے دوران گلگت بلتستان، مظفرآباد، لداخ، جموں کشمیر اور ہماچل پردیش میں ہلکی سے درمیانی بارش اور برفباری کا امکان ہے۔ 23 اور 24 دسمبر کو اتراکھنڈ میں ہلکی بارش اور برف باری کا امکان ہے۔ انڈمان اور نکوبار جزائر، تمل ناڈو، کیرالہ اور لکشدیپ میں ہلکی بارش کا امکان ہے۔ پنجاب، ہریانہ، دہلی، اتر پردیش، بہار، شمالی راجستھان اور تریپورہ کے کچھ حصوں میں شدید دھند پڑ سکتی ہے۔