’منی پور کے داخلی معاملوں میں مداخلت نہ کریں‘، بیرین سنگھ کی میزورم کے وزیر اعلیٰ سے گزارش

منی پور کے وزیر اعلیٰ این بیرین سنگھ نے میزورم کے وزیر اعلیٰ لالدوہوما سے ریاست کے داخلی امور میں مداخلت نہ کرنے کی گزارش کی ہے۔ انھوں نے کہا کہ پڑوسی ریاست (میزورم) منی پور میں نسلی تشدد کو حل کرنے کے لیے اپنی حمایت دے سکتے ہیں، لیکن میزورم کے وزیر اعلیٰ دوسری ریاست کے داخلی امور پر تبصرہ کرنے سے بچیں تو بہتر ہے۔

دراصل منی پور کے وزیر اعلیٰ منگل کے روز ایک تقریب میں شرکت کے بعد صحافیوں سے بات کر رہے تھے جب میزورم کے اپنے ہم منصب کے ایک بیان پر رد عمل ظاہر کیا۔ انھوں نے کہا کہ ’’میں نے میزورم کے نومنتخب وزیر اعلیٰ کا ایک تبصرہ دیکھا ہے کہ ریاستی پولیس کو موریھ میں ان کے لوگوں کو پریشان نہیں کرنا چاہیے۔ مجھے لگتا ہے کہ یہ ان کے آئینی حقوق سے تھوڑا پرے ہے۔‘‘ انھوں نے مزید کہا کہ یہ منی پور حکومت کا داخلی معاملہ ہے۔ موریھ ایک سرحدی شہر ہے جو منی پور کے تینگنوپال ضلع میں ہند-میانمار سرحد پر واقع ہے۔

اس سے قبل ایک جلسہ سے خطاب کرتے ہوئے بیرین سنگھ نے کہا کہ ’’میں نے ہماری ریاست میں نسلی تشدد کے بارے میں آسام کے وزیر اعلیٰ ہیمنت بسوا سرما اور ناگالینڈ کے وزیر اعلیٰ نیفیو ریو سے بات کی تھی اور انھوں نے اس مسئلہ کو حل کرنے اور امن بحال کرنے کے لیے اپنی حمایت دینے کی پیشکش کی تھی۔‘‘ انھوں نے مزید کہا کہ ’’میں نے تریپورہ، میگھالیہ اور سکم کے وزرائے اعلیٰ سے بھی بات چیت کی اور انھوں نے بھی ریاست میں حالات معمول پر لانے کے لیے مدد کا ہاتھ بڑھایا۔‘‘ پھر وہ کہتے ہیں کہ ’’میں ان سب کا تذکرہ اس لیے کر رہا ہوں کیونکہ منی پور اور میزورم کے درمیان کوئی نااتفاقی یا جھگڑا نہیں ہے۔ میزورم میں میتئی اور منی پور میں میزوس ہیں۔ آسام اور تریپورہ میں بھی ایک لاکھ سے زیادہ میتئی ہیں۔ شمال مشرق میں ہم سبھی ایک ساتھ رہتے ہیں۔‘‘