حیدرآباد: محکمہ موسمیات نے خبردار کیا ہے کہ حیدرآباد میں آئندہ تین دن تک ایک بار پھر شدید گرمی کی لہر برقرار رہنے کا امکان ہے۔محکمہ موسمیات کے مطابق گرمی کی لہر 13 جون بروز ہفتہ تک جاری رہ سکتی ہے۔ اس پیش نظر آئی ایم ڈی
کے حیدرآباد دفتر نے ریاست تلنگانہ کے تمام اضلاع کے لیے ایلو الرٹ جاری کیا ہے، جو ہفتہ تک مؤثر رہے گا۔محکمہ موسمیات نے گرمی کی لہر کے ساتھ بعض مقامات پر گرج چمک، آسمانی بجلی گرنے تیز ہواؤں اور جھکڑ چلنے کی بھی پیش گوئی کی ہے۔
تلنگانہ ڈیولپمنٹ پلاننگ سوسائٹی کے اعداد و شمار کے مطابق گزشتہ روز ریاست میں سب سے زیادہ درجہ حرارت 43 ڈگری سیلسیس ضلع منچریال میں ریکارڈ کیا گیا۔ جبکہ حیدرآباد میں سب سے زیادہ درجہ حرارت 39.9 ڈگری سیلسیس امبرپیٹ علاقے میں درج کیا گیا۔
آئی ایم ڈی کی پیش گوئی کے مطابق اگرچہ شہر میں درجہ حرارت بلند رہے گا اور گرمی کی لہر برقرار رہ سکتی ہے، تاہم بعض علاقوں میں ہلکی سے معتدل بارش اور تیز ہواؤں کے امکانات بھی موجود ہیں۔معروف موسمیاتی تجزیہ کار ٹی بالاجی نے سوشل میڈیا پلیٹ فارم ایکس
پر اپنے پیغام میں کہا کہ شمال مغربی ہندوستان سے آنے والی خشک ہواؤں کے باعث شمالی تلنگانہ کے اضلاع میں گرمی کی شدت مزید بڑھ سکتی ہے اور بعض مقامات پر درجہ حرارت 44 ڈگری سیلسیس تک پہنچنے کا امکان ہے۔انہوں نے مزید کہا کہ آج حیدرآباد میں
درجہ حرارت 40 ڈگری سیلسیس سے تجاوز کر سکتا ہے۔محکمہ موسمیات کی پیش گوئی کے پیش نظر شہریوں کو مشورہ دیا گیا ہے کہ شدید گرمی کے دوران غیر ضروری سفر سے گریز کریں پانی کا زیادہ استعمال کریں اور دھوپ میں نکلتے وقت احتیاطی تدابیر اختیار کریں۔
