حیدرآباد: حیدراباد کے مَلکاجگیری پولیس اسٹیشن حدود کے ماروتی نگر علاقے میں ایک سنسنی خیز قتل کی واردات پیش آئی، جہاں ایک رئیل اسٹیٹ تاجر نے مبینہ طور پر اپنی بیوی پر شک کرتے ہوئے اسے گولی مار کر ہلاک کردیا۔
پولیس کے مطابق ارون کمار نامی شخص گزشتہ کچھ عرصے سے اپنی بیوی نشارانی کے ساتھ گھریلو تنازعات کا شکار تھا۔ بتایا جاتا ہے کہ ارون کمار علی الصبح ایک اور شخص کے ساتھ گھر پہنچا اور بات چیت کے بہانے نشارانی پر فائرنگ کردی۔ گولی لگنے سے وہ شدید زخمی ہوگئی اور موقع پر ہی دم توڑ گئی۔
فائرنگ کی آواز سن کر مقامی افراد نے فوری طور پر پولیس کو اطلاع دی۔ پولیس نے موقع پر پہنچ کر لاش کو پوسٹ مارٹم کے لیے گاندھی اسپتال، سکندرآباد منتقل کیا اور مقدمہ درج کرکے تحقیقات شروع کردی ہیں۔
تحقیقات میں انکشاف ہوا ہے کہ ارون کمار نے اپنی پہلی بیوی کو طلاق دینے کے بعد اس کی بہن سے محبت کی شادی کی تھی۔ پولیس کے مطابق تقریباً تین ماہ قبل امبرپیٹ میں گاڑیوں کی تلاشی کے دوران ارون کمار غیر قانونی اسلحہ کے ساتھ پکڑا گیا تھا اور اس کی بندوق ضبط کرلی گئی تھی۔
پولیس کو شبہ ہے کہ اسلحہ ضبط ہونے کے بعد ارون کمار نے پرانے شہر (پرانا بستی) سے تعلق رکھنے والے اپنے دوستوں کی مدد سے ایک اور بندوق حاصل کی اور اسی ہتھیار سے اپنی بیوی کو قتل کردیا۔ پولیس معاملے کے تمام پہلوؤں کی باریک بینی سے جانچ کر رہی ہے۔
