تیلنگانہ انٹرمیڈیٹ نتائج: حافظہ جویریہ فاطمہ کی شاندار کامیابی، 989 نشانات کے ساتھ ریاستی سطح پر نمایاں مقام۔
مکتھل: تلنگانہ انٹرمیڈیٹ کے حالیہ نتائج میں مکتھل کے ٹمریز گرلز گروکل کالج کی طالبہ، حافظہ جویریہ فاطمہ بنت غلام رسول نے 989 نشانات حاصل کرتے ہوئے ریاستی سطح پر نمایاں مقام حاصل کیا ہے۔ ان کی یہ شاندار کامیابی نہ صرف ان کے خاندان بلکہ پورے مکتھل شہر اور تعلیمی حلقوں کے لیے باعثِ فخر بن گئی ہے۔پرنسپل محترمہ الزیبت رانی کے مطابق جویریہ فاطمہ نے ابتدا ہی سے اپنی محنت، لگن اور نظم و ضبط کے ذریعے نمایاں کارکردگی کا مظاہرہ کیا۔
وہ ایک حافظہ قرآن بھی ہیں، جس کی بدولت ان کی تعلیمی زندگی میں خاص نظم و ضبط اور یکسوئی پیدا ہوئی۔ ماہرین تعلیم کا کہنا ہے کہ جن بچوں کی تربیت قرآن کریم کی تعلیم سے ہوتی ہے، وہ دنیاوی تعلیم میں بھی نمایاں کامیابیاں حاصل کرتے ہیں، اور جویریہ فاطمہ اس کی ایک روشن مثال ہیں
۔اس کامیابی پر ضلع نارائن پیٹ کے کلکٹر مسٹر پرتیک جین نے جویریہ فاطمہ کو مبارکباد پیش کرتے ہوئے ان کے روشن مستقبل کے لیے نیک تمناؤں کا اظہار کیا۔ انہوں نے کہا کہ دیہی علاقوں سے تعلق رکھنے والی طالبات کا اس طرح نمایاں کارکردگی دکھانا انتہائی خوش آئند ہے اور یہ دیگر طلبہ کے لیے ایک تحریک ہے۔
جویریہ فاطمہ کے والد غلام رسول صاحب، جو مکتھل کے ایک تعلیمی ادارے گرلز ہائی اسکول میں طویل عرصہ تک خدمات انجام دے چکے ہیں، اپنی بیٹی کی اس کامیابی پر بے حد مسرور نظر آئے۔ انہوں نے کہا کہ یہ اللہ تعالیٰ کا خاص فضل و کرم ہے کہ ان کی بیٹی نے حافظہ قرآن ہونے کے ساتھ ساتھ دنیاوی تعلیم میں بھی اعلیٰ نشانات حاصل کیے۔ غلام رسول صاحب نے اساتذہ اور کالج انتظامیہ کا بھی شکریہ ادا کیا جن کی رہنمائی اور محنت نے اس کامیابی میں اہم کردار ادا کیا۔
تقریب کے دوران کالج کے اساتذہ، عملہ اور طلبہ کے والدین نے بھی جویریہ فاطمہ کو مبارکباد پیش کی اور ان کے لیے نیک خواہشات کا اظہار کیا۔ اس موقع پر دیگر نمایاں کامیابی حاصل کرنے والی طالبات کا بھی استقبال کیا گیا، جنہوں نے کالج کا نام روشن کیا۔تعلیمی ماہرین کے مطابق یہ کامیابی اس بات کا ثبوت ہے کہ محنت، مضبوط ارادہ اور صحیح رہنمائی کے ذریعے ہر طالب علم اعلیٰ مقام حاصل کر سکتا ہے۔
مکتھل ٹمریز گرلز گروکل کالج کی یہ کامیابی علاقے میں تعلیمی بیداری کا ایک مثبت اشارہ ہے اور امید کی جا رہی ہے کہ آئندہ بھی یہاں کے طلبہ اسی طرح نمایاں کامیابیاں حاصل کرتے رہیں گے۔
