مایاوتی کا بڑا فیصلہ، آکاش آنند کو تمام عہدوں سے کیا برطرف، آنند کمار کو بنایا نیشنل کوآرڈینیٹر

بہوجن سماج پارٹی (بی ایس پی) کی قومی صدر مایاوتی نے اپنے بھتیجے آکاش آنند کو نیشنل کوآرڈینیٹر کے عہدے سے ہٹا دیا ہے۔ مایاوتی نے آنند کمار کو نیشنل کوآرڈینیٹر بنایا ہے اور راجیہ سبھا رکن رام جی گوتم کی ذمہ داری میں اضافہ کیا ہے اور وہ بھی اب نیشنل کوآرڈینیٹر ہوں گے۔ واضح ہو کہ مایاوتی نے گزشتہ دنوں آکاش آنند کے سسر اشوک سدھارتھ کو ہٹا دیا تھا۔ بی ایس پی سپریمو نے ایک میٹنگ کے دوران اپنی جانشینی پر واضح طور پر کہا کہ ’’میری آخری سانس تک کوئی جانشین نہیں ہوگا۔‘‘

علاوہ ازیں مایاوتی نے کہا کہ اب ان کے بھائی آنند کے بچوں کی شادی سیاست سے وابستہ خاندان میں نہیں ہوگی۔ اس کے پیچھے کی وجہ بتاتے ہوئے مایاوتی نے کہا کہ آنند کمار کے بارے میں یہ بھی بتانا چاہتی ہوں کہ موجودہ بدلے ہوئے حالات میں پارٹی اور تحریک کے مفاد میں اب انہوں نے اپنے بچوں کا رشتہ بھی غیر سیاسی خاندان کے ساتھ جوڑنے کا فیصلہ کیا ہے۔ تاکہ اشوک سدھارتھ کی طرح اب مستقبل میں کبھی بھی پارٹی کا نقصان نہ ہو سکے۔ علاوہ ازیں بی ایس پی کی جانب سے جاری پریس ریلیز میں کہا گیا ہے کہ ’’اتنا ہی نہیں بلکہ اب میں نے خود بھی یہ فیصلہ لیا ہے کہ میرے جیتے جی اور میری آخری سانس تک بھی اب پارٹی میں میرا کوئی بھی جانشین نہیں ہوگا۔ جس فیصلے کا پارٹی کے لوگوں نے دل سے استقبال کیا۔‘‘

قابل ذکر ہے کہ پریس ریلیز میں کہا گیا کہ بی ایس پی سپریمو نے اپنی اس بات کو آج پھر سے دوہرایا ہے کہ میرے لیے پارٹی اور تحریک پہلے ہے۔ بھائی-بہن اور ان کے بچے اور دوسرے رشتہ دار وغیرہ سب بعد میں آتے ہیں۔ اس تناظر میں انہوں نے پارٹی والوں کو یقین دلایا ہے کہ جب تک میں زندہ ہوں اپنی آخری سانس تک پوری ایمانداری اور لگن کے ساتھ پارٹی کو آگے لے جانے کی ہر ممکن کوشش کروں گی۔ وہیں بی ایس پی نے مایاوتی کے حوالے سے یہ بھی بیان جاری کیا ہے کہ آکاش آنند کے سسر اشوک سدھارتھ، بی ایس پی سپریمو کے نام کا غلط استعمال کرتے تھے۔